Облыс әкімі Нұрлыбек Нәлібаев бастаған бір топ шенеунік осыдан бір жарым ай бұрын сол жағалаудағы жаңа автовокзалдың лентасын қиған. Сол кезде тұрақта Арал, Қазалы, тіпті Ташкентке қатынайтын автобустар тұрған.

Қазір олардың бірі де орнында жоқ, тұрақ бос тұр. Жаңа автовокзал қаңырап, автобустардың бағыты жазылған табло да сөніп тұр.

Ал қала орталығында орналасқан жеке кәсіпкерге тиесілі ескі автовокзалда күн сайын абыр-сабыр. Мұнда Астана, Алматы, Шымкент шаһарлары мен аудандарға жүретін автобустар толып тұр. Халық жаңа автовокзал тым алыста, оған бару тиімсіз дейді. Жаңа автовокзалда жолаушыларға барлық жағдай жасалған дейді жауаптылар. Ал сәуірде пайдалануға берілген нысанға автобустарды әкелу жұмыстары енді ғана басталыпты.

Қызылорда облыстық жолаушылар көлігі және автомобиль жолдары басқармасының басшысы Жәнібек Сыздықов тұрақты кезең-кезеңімен ашылу көзделіп отырғанын айтты.

Айып тұрағының директоры мен полиция қызметкері бөтен көліктерді сатумен айналысқан

“Бірінші ауданаралық маршруттарды үйрету жұмыстары кестеге сәйкес жүргізіліп жатыр. Одан кейін облысаралық болады. Сосын біздің Ташкент-Қызылорда деген халықаралық маршрутымыз бар. Сол да жүргізіледі. Бірақ бюджеттің 975 миллион теңгесі жұмсалған заманауи нысанға түрлі бағыттағы автобустардың қашан келетіні әзірге белгісіз. Оған қоса, ауыл-аймаққа қатынайтын автобус жүргізушілері шет жақта тұрған автовокзалға бармаймыз деп отыр”, – деді Жәнібек Сыздықов.

Айта кетейік, Қызылорда облысын Қырымбек Көшербаев басқарған сәтте қалада автовокзал ашылған еді. Бірақ халық оның пайдасын сол күйі көрмеді. Тіпті сұраныс болмаған соң нысан сауда үйіне айналды.

Еске салайық, 13 сәуірде облыс әкімі Нұрлыбек Нәлібаев Қызылорданың сол жағалауында бой көтерген заманауи үлгідегі жаңа автовокзалдың ашылу рәсіміне қатысып, қала тұрғындарын құттықтағанын жазған едік.

Талқылау