Қазақстаннан көмірді шығаруға алты айға тыйым салынбақ

Қазақстаннан көмірді шығаруға алты айға тыйым салынбақ. Мұндай шектеу халықтың дүрлігуі мен энергетикалық қауіпсіздікті болдырмау үшін енгізілмек, деп хабарлайды Stan.kz ақпарат агенттігі. 

Индустрия және инфрақұрылымдық даму министрлігі тиісті бұйрық жобасын "Ашық НҚА" порталында жариялады. Онда Қазақстан аумағынан көмірді автокөлікпен шығаруға алты айға тыйым салу ұсынылып отыр. 

Түсіндірме жазбада көмірді тұтыну көлемі шамамен 9,6 млн.тоннаны құрайтыны айтылған. Оның ішінде коммуналдық-тұрмыстық секторға-2,6 млн. тонна, халыққа – 7 млн. тонна.

"Қыркүйек айында күрт салқындауға байланысты елдің орталық және солтүстік аймақтарында көмірге сұраныс күрт өсті.

Осы жағдайды пайдалана отырып, жосықсыз алыпсатарлар көмірді сатып алудың ең жоғары кезеңінде көмірдің бағасына өздерінің "айналымдарын" қосты, яғни 13 мың теңгеден сатып алды және тоннасына 30 мың теңгеге дейін қайта сатты, бұл халық үшін теріс әсерін тигізді", - деп түсіндірді министрлік өкілдері.

• Атырауда мұнай өңдейтін зауыт шұғыл түрде жұмысын тоқтатты

• Қазақстанда жанармайдың шекті бағасы бекітілді

Халықты көмірмен және энергетикалық қауіпсіздікті қамтамасыз ету бойынша дүрлікпені болдырмау мақсатында ҚР Индустрия және инфрақұрылымдық даму министрлігі ең жоғары кезеңде, яғни 2022 жылғы 1 тамыздан бастап 6 айға көмірді автомобиль көлігімен әкетуге тыйым салуды енгізуді орынды деп санайды.

Құжат ашық талқылауға 10 тамызға дейін шығарылды. Бұған дейін Қазақстаннан мұнай өнімдерін шығаруға тыйым салынған еді.