Балаларды грантқа түсіруге уәде беріп, 600 миллион теңге жымқырған білім беру орталығының басшысы сотталды
Қазақстанда жүздеген ата-ананы алдаған білім беру орталығының басшысы сотталды. Айыпталушы Жақып Халықбердиевтің әрекетінен 386 адам зардап шегіп, жалпы шығын 600 миллион теңгеге жуықтаған. Бұл туралы Stan.kz ақпарат агенттігі хабарлайды.
Бір жыл бұрын Қазақстанның бірнеше қаласында оқушыларды жоғары оқу орындарына түсуге дайындайтын Gasyr Foundation School білім беру орталығына қатысты дау шыққан еді. Орталықтағы оқу ақысы арзан болмаған: 1,5–2 миллион теңге аралығында. Есесіне ата-аналарға балаларының жоғары оқу орнына грантқа түсетініне кепілдік берілген.
Баласының болашағына сенген жүздеген ата-ана орталыққа ақша салған. Бірі қарыз алса, енді бірі несие рәсімдеген. Олар балаларының жоғары білімді тегін алатынына үміттенген.
Жобаны ұйымдастырушы Түркістан облысының тумасы Жақып Халықбердиев болған.
Алайда кейін орталықтың жұмысы нашарлай бастаған. Мұғалімдерге бірнеше ай бойы жалақы төленбеген соң, қызметкерлері жиі ауысқан. Соның салдарынан оқушылардың білім деңгейі де өспеген. Ал былтыр күзде орталықтар бірінен соң бірі жабыла бастаған.
Ақшасынан айырылған жүздеген клиент құқық қорғау органдарына шағымданды. Осыдан кейін білім беру бизнесінің иесі ұсталды.
Жасанды интеллект агентінің есебіне сүйенсек, полицияға 386 адам арыз жазған. Осылайша жалпы шығын көлемі 600 миллион теңгеге жуық екені анықталған.
Сондықтан кәсіпкердің әрекеті Қылмыстық кодекстің 190-бабының 4-бөлігі бойынша (Аса ірі мөлшерде жасалған алаяқтық) сараланған. Бұл бап бойынша 5 жылдан 10 жылға дейін бас бостандығынан айыру жазасы қарастырылған.
Судья Ернар Қасымбеков айыптау бабын жеңілдетіп, Халықбердиевті бірнеше рет жасалған алаяқтық үшін кінәлі деп таныды. Бұл — Қылмыстық кодекстің 190-бабы 3-бөлігінің 4-тармағы (Бірнеше рет жасалған алаяқтық).
Кәсіпкерге рақымшылық ескеріле отырып, 3,5 жылға бас бостандығынан айыру жазасы тағайындалды. Ол тергеу изоляторында 10 айдан астам уақыт өткізгендіктен, енді түрмеде екі жылдай ғана отыруы мүмкін.
Адамдарды алдауға көмектескен Қаракөз Аябекова 2 жыл 8 айға бас бостандығынан айырылды. Алайда оған қатысты жазаны өтеу төрт жылға кейінге қалдырылды.
Ал Халықбердиевтен кейін орталықтарды басқарған Салтанат Ермахановаға төрт жылға бас бостандығын шектеу жазасы тағайындалды. Сот үкімі әлі заңды күшіне енген жоқ.
Айта кетейік, бұған дейін Мыңға жуық ата-ана Tesla Education білім беру орталығын алаяқтық жасады деп айыптағаны туралы жазған едік. Себебі компания олардың балаларын оқытамыз деп миллиондаған ақша алып, келісімшартты бұзғаннан кейін қаржысын қайтармаған. Олардың айтуынша, зардап шеккен адамдар саны 1000-ға жуық.
"Жарақатты үйде алдым деп айт": Жұмыс берушілер өндірістегі оқиғаны неге жасырады және қызметкер не істеуі керек
