Қазақстандағы мобильді интернеттің жылдамдығы: 4G-ге қарағанда 5G он есе жылдам болып шықты

Биыл наурыз айында Finprom.kz мобильді интернет жылдамдығы бойынша жүргізген зерттеуде Қазақстан бір айда бір сатыға көтерілді, сәйкесінше 50-орынға жайғасып, топ-50 елдің қатарына енді. ҚР-дағы мобильді интернеттің жылдамдығы 81,7 Мбит/с құрады — бұл бүкіл кезеңдегі ең жақсы нәтижелердің бірі. Жалпы, бір жыл ішінде еліміз бірден 20 сатыға көтерілді, бұл сектордың қарқынды дамып келе жатқанын және мобильді интернеттің жылдамдығы мен сапасының жақсарғанын көрсетеді.

Айта кетейік, бұл рейтингте Қазақстан Румыния, Венгрия, Ұлыбритания, Германия, Түркия, Жапония және т.б. елдерді басып озды.

ОА мен ЕАЭО елдеріне келетін болсақ, бұл жерде ҚР пайдасына алшақтық өте айқын. Сонымен, Қазақстанда мобильді интернет жылдамдығы Өзбекстанға қарағанда 58%-ға, Қырғызстанға қарағанда 75,9%-ға, Арменияға қарағанда 94,8%-ға, Ресеймен салыстырғанда 2,2 еседен астам және Беларуське қарағанда 4 есе жоғары. Айтпақшы, Ресей рейтингтегі 15 аутсайдердің қатарына енді, ал Беларусь тіпті әлемдегі ең нашар көрсеткіштері бар үш елдің қатарына енді.

Ookla* сарапшылары өз зерттеулерінде атап өткендей, ҚР-да мобильді интернет жылдамдығының өсуі 5G желілерінің дамуына байланысты қуатты серпін алды. Қазақстан — ОА мен ЕАЭО елдерінің ішінде алғашқылардың бірі болып 5G-ді коммерциялық түрде іске қосты, ал бесінші буын желісін қолдана бастаған операторлар Tele2/Altel және Kcell болды. 2023 жылдың басынан бастап 3,6–3,7 ГГц және 3,7–3,8 ГГц диапазонында 100 МГц спектріндегі екі блокты алғаннан кейін екі оператор да барлық ірі қалалар мен облыс орталықтарында 5G базалық станцияларын белсенді түрде орналастыруда. Айтпақшы, бұл спектрлерді байланыс операторлары бұрын-соңды болмаған сома — 156 млрд теңге жұмсап, аукционда ұтып алған болатын. 2025 жылдың сәуір айының басындағы жағдай бойынша Қазақстанда 3 мыңнан астам 5G базалық станциясы орнатылған.

Түсіну үшін ҚР-дағы 4G және 5G көрсеткіштерін салыстырайық. 2024 жылдың бірінші жартыжылдығында 5G желісінде мобильді интернетті жүктеу жылдамдығы 332,11 Мбит/с құраса, 4G желісінде — небәрі 32,59 Мбит/с құрады, яғни айырмашылық 10 еседен астам. Деректерді жүктеп шығару жылдамдығы бойынша жағдай да осыған ұқсайды: 4G үшін 12,6 Мбит/с, 5G үшін 32,3 Мбит/с, айырмашылық 2,5 есе. 4G-дегі 46 мс кідіріспен салыстырғанда, 5G кідірісі әлдеқайда жақсы — 30,5 мс.

Осылайша, бесінші буын желісі өзінің алдындағы желіден айтарлықтай озып кетті және дәл осы 5G Қазақстандағы мобильді интернеттің жылдамдығы мен сапасының өсу нүктесіне айналды.

*Ookla — интернет-қосылыстардың жылдамдығы мен сапасын талдауға маманданған жетекші халықаралық компания.

Сондай-ақ Ookla зерттеушілері Қазақстанның мобильді нарығының бәсекеге қабілеттілігі жоғары екенін, ал Tele2, Kcell және Beeline сияқты байланыс операторларының бұл нарықта басты рөл атқаратынын атап өтті. Бұған дейін жазып өткеніміздей, әлемдік стандарттар бойынша, егер елдегі байланыс секторында үш немесе одан да көп оператор болса, оның бәсекеге қабілеті жоғары болып саналады.

Байланыс операторлары тұрғысынан барлық технологиялардың жиынтық нәтижелері бойынша Tele2 ҚР-дағы мобильді желі сапасы бойынша көшбасшы болды. Бұл операторда мобильді интернетті жүктеудің орташа жылдамдығы 55,12 Мбит/с құрады.

Екінші орынға 48,7 Мбит/с жылдамдықпен Kcell орналасты, ал Beeline мобильді интернетінің жылдамдығы 27,94 Мбит/с құрады.

Жүктеп шығару жылдамдығына қатысты жағдай да осыған ұқсас: ең жоғарғы жылдамдық Tele2-де (17,2 Мбит/с), ал Kcell мен Beeline бірдей нәтиже көрсетті (операторлардың әрқайсысында — 12,2 Мбит/с).

Желінің кідіруіне келетін болсақ, бұл жерде де ең жақсы көрсеткіш Tele2-де, одан кейінгі орындарда — Kcell және Beeline.

Осылайша, бесінші буын желілерін дамытудың арқасында Қазақстанның мобильді байланыс нарығы еліміздің бүкіл тарихындағы ең жақсы нәтижелерді көрсетіп, әлемдік деңгейде барған сайын жоғары орындарды иеленуде.