Қазақстанда есірткіге қанша бала тәуелді екені белгілі болды
Денсаулық сақтау министрлігі есірткі қолданатын қазақстандықтар туралы мәліметтерді баяндады. Мәлімдеулерінше, бақылауда 108 722 адам бар. Бұл туралы Stan.kz ақпарат агенттігі хабарлайды.
Фото: Pexels
Медициналық көмекті ұйымдастыру бөлімінің басшысы Анжела Бексұлтанова орталық коммуникациялар қызметі алаңында өткен дөңгелек үстел барысында Қазақстанда "психоактивті заттарды қолдану салдарынан психикалық мінез-құлық бұзылысы" диагнозымен 108 722 адамның динамикалық бақылауда екенін айтты. Оның ішінде 18 329 азамат – есірткі және психотроптық заттарға тәуелді.
"Нашақорлардың 91% (16 817) ерлер, 9% (1 512) әйелдер. 2 734 (15 пайызы) адам 18 бен 29 жас аралығында, ал 66-ы балалар мен жасөспірімдер. Ресми статистика елдегі нашақорлардың нақты санын көрсетпейді, өйткені көптеген нашақорлар өз жағдайын жасырады", – деді Анжела Бексұлтанова.
2023 жылы 24 сағаттық стационарда 3534-ке жуық нашақор емделді.
"20 жылдан бері нашақорларды медициналық-әлеуметтік оңалтудың кешенді бағдарламасы жүзеге асырылып келеді, оған детоксикация, психотерапевтік және психокоррекциялық емдеу, әлеуметтік оңалту кіреді", – деді денсаулық сақтау министрлігінің өкілі.
Биыл медициналық-әлеуметтік оңалту бөлімшелерін Абай, Ұлытау, Маңғыстау және Шығыс Қазақстан облыстарында орналастыру жоспарланып жатыр.