Қарағандыда 9 жасар бала еріген су ағатын каналға батып кетті
Қарағандының Октябрь ауданында 9 жасар бала еріген су ағатын каналға батып кетті, деп хабарлайды Stan.kz ақпарат агентгігі. Бұл жөнінде облыстың төтенше жағдайлар департаменті мәлімдеді.
Қайғылы оқиға Қарағанды-Сұрыптау өңірінде болған. Оқиға туралы ақпарат Қарағанды облысы төтенше жағдайлар департаментінің басқару пультіне сағат 15.45-те келіп түскен. Куәгерлердің құтқарушыларға айтуынша, балалардың бірі ойнап жүріп ашық каналға құлап кеткен.
"Оқиға Серов көшесіндегі үйдің жанында болған. Оқиға орнына келген құтқарушылар 2012 жылы туған баланың денесін алып шығарды. Қарағанды облысының төтенше жағдайлар департаменті баланың ата-анасына көңіл айтады", - деп мәлімдеді ведомство.
- Семейде фотосессия жасамақ болған екі қыз мұз астына құлап кетті – олардың бірі қаза тапты
- Ақтөбеде оқушы қыз еріген қардың суына батып кете жаздады
- Алматы облысында екі балықшы суға батып кетті
Сондай-ақ департамент ата-аналарды балаларын бақылаусыз қалдырмауға шақырды.
"Ата-аналар әрқашан баланың қайда екенін, кіммен және қашан үйге оралатынын білуі керек", - деп қосты департаментте.
Қарағанды қаласының әкімдігі де қаза тапқан баланың отбасы мен жақындарына көңіл айтты. Әкімдік жерлеуді ұйымдастыруға көмектесетінін атап өтті.