2022 жылдың басынан бастап Бас прокуратура қаңтар оқиғалары кезеңінде құқықтық тәртіп пен қауіпсіздікті қамтамасыз етпеуге, сондай-ақ азаматтарға азаптауды қолдануға байланысты күш органдарының қызметкерлеріне қатысты тергеп-тексеруді жалғастырып жатыр.

“Оларды жасағаны үшін облыстық полиция және ұлттық қауіпсіздік органдарының бірқатар басшысы мен қызметкері сотталды. Жүргізіліп жатқан тергеп-тексеру шеңберінде ішкі істер экс-министрі Ерлан Тұрғымбаевтан жауап алынды, – делінген мәлімдемеде.

Сондай-ақ, бас прокуратура Алматы облысы Қарасай ауданы Қошмамбет ауылында орналасқан арнайы қабылдау жағдайында ұсталған азаматтарға азаптауды қолдану туралы іс бойынша дәлел жинады.

2024 жылғы 16 наурызда осы қылмысты жасағаны үшін Қарасай ауданының арнайы қабылдау орыны және полиция басқармасының бұрынғы басшылары қамауға алынды.

“Бұдан басқа, қызметтік атыс қаруын ұрлау фактілері бойынша Талдықорған қаласы полиция басқармасының бұрынғы басшылығына қатысты тергеп-тексеру жалғасуда. Осы тергеп-тексерулер бойынша басқа да мәліметтер тергеп-тексерудің, сондай-ақ азаматтардың құқықтары мен заңды мүдделерін сақтай отырып, жұртшылыққа жеткізіледі”, – деп хабарлады бас прокуратураның баспасөз қызметі.

Бұған дейін Қаңтар оқиғасына байланысты бұрынғы ішкі істер министрі Ерлан Тұрғымбаевқа қатысты қылмыстық іс қозғалғаны туралы ақпарат пайда болған еді. Мұны мәжіліс алаңында журналистер қазіргі министр Ерлан Сәденовтен сұрады.

"Ішкі істер министрлігі оны тексеріп жатқан жоқ, сондықтан қандай іс, қандай бап бойынша екенін айта алмаймын. Бұл жерде құзырлы органдар тергеу жүргізді", – деді Сәденов.

Талқылау