Азық-түлік корпорациясының екі қызметкеріне пара алғаны үшін 48 миллион теңге айыппұл салынды

Астана қаласы қылмыстық істер жөніндегі ауданаралық соты "Азық-түлік корпорациясы ҰК" АҚ қаржы департаментінің директоры мен бас маманын соттады. Бұл туралы Stan.kz ақпарат агенттігі хабарлайды.

Фото: Видеодан кадр

Корпорацияның қаржы департаментінің директоры Н.Г. Жұмаділов және бас маманы Г.Ж. Әбенов кәсіпкерден құжаттарды жинау бойынша бұрын көрсеткен қызметтері үшін, сондай-ақ астық түрінде тауарлық несие беру туралы шартқа қол қоюға көмектескені үшін пара алған.

Сотталғандарға қатысты сот шешімімен мемлекеттік қызметте және квазимемлекеттік сектор субъектілерінде лауазымдарды атқару құқығынан өмір бойына айыра отырып, жалпы сомасы 48 млн теңге айыппұл түрінде жаза тағайындалды.

• Алматыда Бишімбаевқа қарсы митингке шыққан феминистке 184 мың теңге айыппұл салынды

• Ақмола облысында жасөспірімнің орынсыз қалжыңы үшін ата-анасы 18 миллион теңгеге дейін айыппұл арқаламақ

“Қала прокуратурасы үкімді бас бостандығынан айыру жазасына өзгерту бойынша апелляциялық өтініш енгізді. Қылмыстық кодекстің 41-бабына сәйкес айыппұл белгіленген мерзімде төленбеген жағдайда жаза шарасы бас бостандығынан айыруға ауыстырылады”, – деп мәлімдеді Антикор.

Үкім заңды күшіне енген жоқ.

Бұған дейін "Азық-түлік корпорациясының" басшылары пара алды деген күдікпен ұсталған еді.