Астанада зардап шеккен өрт сөндірушілердің отбасына пәтер сыйға беріліп, ипотекалық несиесін жауып беретін болды
Астанада зардап шеккен өрт сөндірушілердің отбасыларына үш бөлмелі пәтер табысталып, ипотекалық несиелерін жабуға көмектесетін болды, деп хабарлайды Stan.kz ақпарат агенттігі. Бұл жөнінде қала әкімдігі мәлімдеді.
"Мемлекет басшысының атынан ҚР ТЖ министрі Юрий Ильин мен елорда әкімі Алтай Көлгінов өрт сөндіруші Асқар Забикулиннің отбасына үш бөлмелі пәтердің сертификатын табыс етті. Пәтер демеушілік қаражат есебінен берілді", - делінген жұма күні тараған ақпаратта.
Өрт сөндіруші Аян Кемпіровтың отбасына ипотеканы өтеуге көмек көрсетін болады.
Сонымен қатар, Асқар Забикулин мен Аян Кемпіровтың отбасыларына жалпы сомасы 6 миллион теңге болатын несиелерін өтеуге көмектесу туралы шешім қабылданды.
Асқар Забикулин – азаматтық қорғау капитаны.
1994 жылы 5 қаңтарда Ақмола облысы, Еңбекшілдер ауданы, Казгородок ауылында дүниеге келген. Ішкі істер министрлігі Төтенше жағдайлар министрлігінің Көкшетау техникалық институтын бітірген.
- "Денесінің 80%-ын күйік шалған": Астанада үш адамды құтқарған өрт сөндіруші комаға түсті
- Жұбайына хабарласуды өтінді: Құтқару барысында күйік шалған елордалық құтқарушының достары оқиғаны баяндап берді
- Астанада үш адамды құтқарған өрт сөндірушінің жарақат алуына байланысты қызметтік тексеру жүріп жатыр
Еңбек жолын "Қараөткел" ПЧ-9 өрт сөндіру бекетінің қарауыл бастығы болып бастаған.
2021 жылы Төтенше жағдайлар министрлігі Астана қаласы Төтенше жағдайлар департаментінің Өрт сөндіру және авариялық-құтқару жұмыстары қызметі кезекшісінің көмекшісі қызметіне тағайындалды.
Аян Кемпіров – азаматтық қорғау аға сержанты.
1988 жылы 5 мамырда Қостанай қаласында дүниеге келген. Қарағанды политехникалық колледжін білгір механик мамандығы бойынша бітірген.
Ол 2021 жылы төтенше жағдайлар министрлігі Астана қаласы Төтенше жағдайлар департаменті Өрт сөндіру және авариялық-құтқару жұмыстары қызметі No10 өрт сөндіру бөлімінің командирі лауазымына тағайындалды.
16 қарашада елордалық өрт сөндірушілер Астанада өртеніп жатқан пәтерден бес адамды құтқарды. Кейін төтенше жағдайлар министрлігі хабарлағандай, өртті сөндіру кезінде өздерін күйік шалған. Өрттің шығу себебі анықталуда.
Еске салайық, 16 қарашада Астанадағы пәтерлердің бірінен өрт шығып, екі ересек пен бір баланың көмірқышқыл газынан уланғаны жазылған.
Оларды құтқарып қалған қызметкердің беті, арқасы, іші, жоғарғы және төменгі жақтары 2-3 дәрежелі күйік шалды. Денесінің 80% күйік шалған.