Осы бағытта жаңа нысандар мен әдістер енгізіліп, дарынды балалармен жұмыс жасауда білім беру мекемелері мен басқа құрылымдардың ынтымақтастығы мен өзара байланысы ұйымдастырылған. Түрлі конкурстар мен олимпиадаларға қатысқан оқушылардың қатысу нәтижелілігі артқан. Оқушылар олимпиадасы мен ғылыми конкурстардың республикалық, халықаралық кезеңінің жеңімпаздары мен жүлдегерлерінің саны артты.

Елордада жалпы білім беретін мекемелерде мектепке дейінгі жастан бастап жоғары сынып оқушыларымен жұмыс істеу жүйесі қалыптасқан. Барлық іс-шаралар жас дарындардың интеллектуалдық және шығармашылық қабілеттерін ерте жастан бастап дамытуға бағытталған.
Атап айтқанда, балалардың жас ерекшеліктерін ескере отырып, мектепке дейінгі мекемелердің тәрбиеленушілері мен бастауыш сынып оқушыларына арналған "Жұлдызды жол" олимпиадасы, "Елорда Еркетайы" шығармашылық байқауы, "Бестемше" спорттық іс-шарасы, 2-7 сынып оқушыларына арналған қалалық ғылыми жұмыстар мен шығармашылық жобалар байқауы, 2-4 сынып оқушылары арасындағы Республикалық пәндік олимпиада және т.б байқаулар өткізіледі.

Орта буын оқушылары үшін жалпы білім беретін пәндер бойынша жасөспірімдер олимпиадасы, 5-6 сыныптар үшін республикалық пәндік олимпиада, 7-8 сынып оқушылары үшін географиядан Ұлттық олимпиада және химия және биология бойынша жасөспірімдер олимпиадасы ұйымдастырылады. Жеңімпаздар мен жүлдегерлер "Дарын" республикалық ғылыми-практикалық орталығының дипломдарымен, медальдармен және бағалы сыйлықтармен марапатталады. Аталған зияткерлік сайыстардың барлығы – республикалық және халықаралық деңгейдегі жарыстарға қатысуға жетелейтін қадамдар.

Ал жоғары сынып оқушылары республикалық деңгейдегі президенттік және лингвистикалық олимпиадалар, жалпы білім беретін пәндер бойынша ғылыми жобалар байқауы, қалалық және республикалық "Абай оқулары", "Ақселеу оқулары", "Қадыр оқулары", "Мағжан оқулары", интеллектуалдық және шығармашылық байқаулар: "Абай әлемі", "Менің кіші Отаным", "Менің бастамам – менің Отаным үшін", халықаралық STEM олимпиадасы, "Robotek Grand Tournament" республикалық робототехника турнирі, робототехникадан ғылыми-техникалық жобаларда бақ сынап жүр.

Жыл сайын олимпиада қозғалысының сапасы артып, қатысушылар қатары көбейіп келеді. Тек 2023 жылдың өзінде Астана олимпиадашылары 522 медаль иеленді, оның 257-сі республикалық, 265-і халықаралық. Астана құрамасы жыл сайын "Ең үздік олимпиадалық команда" атағын жеңіп алады.

Зияткерлік олимпиадаларға сапалы дайындалу және сәтті өнер көрсету үшін "Астана дарыны" дарынды балалар мен талантты жастарды анықтау және қолдау орталығы каникул күндері оқу-жаттығу жиындарын өткізеді. Бұл жиын кезінде өткен жылдардағы халықаралық олимпиадалардың бұрынғы жеңімпаздары мен жүлдегерлері тәжірибелерімен бөлісіп, жас зияткерлер дайындығына өз үлестерін қосады.

Пәндік олимпиадаларға қатысу мектеп оқушыларына олардың тұлғалық өсуі мен дамуына мол мүмкіндіктер береді. Бұл – жаңа білімді меңгеру, әрі қарай мамандық таңдауға деген қабілеттері мен қызығушылығын анықтау, емтиханға дайындалу, өз бетінше іздену, ой -өрісін дамытуға көмектеседі.

Мектеп түлектеріне мамандық таңдауға және олардың талаптары мен қажеттіліктеріне сәйкес келетін оқу орнын таңдауға көмектесу үшін Орталықта "Qabilet" кәсіптік бағдар беру қызметі жұмыс істейді.

Аталған қызметтің негізгі мақсаты – 7-11 сынып оқушыларының зияткерлік қабілеттері мен кәсіби өзін-өзі тану, оның психологиясын, дағдысын, білімін, дарындылығын ескере отырып, оқушының кез келген мамандыққа бейімділігін анықтауға бағытталған.

"Qabilet" қызметі оқушылардың зияткерлік қабілеттерін анықтау үшін диагностика жүргізіп, кәсіби кеңес береді.

Дарынды балаларды қолдау және ынталандыру мақсатында қала әкімі жыл сайын елорданың дарынды оқушылары – халықаралық, республикалық олимпиадалар мен ғылыми жоба байқауларының жеңімпаздары және жүлдегерлерімен кездеседі. Оқушылар Астана қаласы әкімінің атынан алғыс хаттармен және ақшалай сертификаттармен марапатталады.

Астанадағы білім беру саласының жүйелі және жемісті жұмысының арқасында елордалық мектеп оқушыларының есімдері халықаралық интеллектуалдық ареналарда жиі естіліп жүр.

Халықаралық рейтингтік олимпиадалардың жеңімпаздары мен жүлдегерлері (IMO, ICho, IPho, IGeo, IOI, IOL) қазақстандық жоғары оқу орындарының білім беру гранттарын иеленсе, сонымен қатар беделді шетел университеттеріне 100% жеңілдікпен оқуға шақырту алады.

Мемлекеттің жан-жақты қолдауы және Қазақстан оқушыларының тамаша жетістіктерінің арқасында 2024 жылы шілде айында Астанада тарихымызда алғаш рет әлемдегі ең беделді олимпиадалардың бірі – биология пәнінен халықаралық олимпиада (ІВО) өтеді.

Кең инновациялық бағыт, бүгінде жүзеге асырылып жатқан қызықты жобалар елордалық білім беруді жоғары деңгейге көтеріп, уақыт көшіне нық қадам басып, болашаққа батыл қарауға мүмкіндік береді.

Талқылау