Ақтөбеде студент қыз қала тұрғынының интимдік видеосын жариялаймын деп бопсалаған
Ақтөбе полиция департаменті ақтөбелік студентті қылмыс үстінде ұстады. Бұл туралы Stan.kz ақпарат агенттігі хабарлайды.
Полиция департаменті ұйымдасқан қылмысқа қарсы күрес басқармасының қызметкерлері жедел-іздестіру шараларын жүргізу барысында Ақтөбе қаласының жергілікті университетінің студентінен ірі көлемде ақшалай қаражат бопсалау дерегін анықтады.
Мұны осы оқу орнының студенті ар-намысы мен қадір-қасиетіне нұқсан келтіретін материалдарды жариялайтынын айтып қорқытып, бопсалаған. Осы жылдың 25 наурызында жедел-тергеу іс-шараларын жүргізу барысында жедел уәкілдер қолма-қол ақша алғаннан кейін күдіктіні ұстады.
Ұсталған қыз кінәсін мойындады. Ол қылмысы үшін 3 жылға дейін бас бостандығынан айырылады.
Еске салайық, Астанада 40 жастағы ер адам бірнеше ай бойы астаналық әйелге қоқан-лоқы көрсетіп, ақша бопсалап отырғанын жаздық. Егер бермесе әйелдің интим видеосы мен суреттерін әлеуметтік желіге жүктеймін деп қорқытқан.