Дастан Сәтпаев "Челси" сапындағы екінші ойынын өткізді

Қазақстан футбол құрамасының вингері Дастан Сәтпаев Австралиядағы маусымалды жолдастық тур аясында өткен "Тоттенхэмге" қарсы кездесуде "Челси" сапындағы екінші ойынын өткізді. Бұл туралы Stan.kz ақпарат агенттігі хабарлайды.

Австралиядағы маусымалды тур аясындағы екінші жолдастық кездесуде Дастан Сәтпаев матчты қосалқы құрамнан бастап, екінші таймның 70-минутында алаңға шықты.

Қазақстандық футболшы алғашқы голдың авторы Эстеваоның орнына шығып, Лондон клубының негізгі құрамындағы екінші ойынын қатарынан өткізу мүмкіндігіне ие болды.

Қазақстан құрамасының шабуылшысы 20 минут ішінде 11 пастың 9-ын дәл орындады, шабуылдың соңғы үштен бір бөлігіне бағытталған 4 пастың 2-ін дәл жеткізді, 1 сәтті доп тартып алу әрекетін жасады. Flashscore порталы Сәтпаевтың ойынына 6,3 деген баға берді.

Кездесу "Тоттенхэмнің" 2:1 есебімен жеңісімен аяқталды. Матчтағы есепті 21-минутта бразилиялық шабуылшы Эстевао ашты. Алайда бірінші тайм аяқталар сәтте "Тоттенхэм" таразы басын теңестірді. Голдың авторы – италиялық жартылай қорғаушы Сандро Тонали.

49-минутта "Тоттенхэм" бір ойыншысынан айырылып, алаңда он футболшымен қалды.

Сан басымдығына қарамастан, "Челси" қарсылас қақпасына қайта гол соға алмады. Есесіне "Тоттенхэм" қосымша уақытта жеңісті жұлып әкетті. 90+2-минутта бразилиялық шабуылшы Ришарлисон жеңіс голын соқты.