200 мың доллар, көлік пен екі қабатты коттедж: Олимпиадада жүлде алған өзбекстандық спортшыларға қандай сыйлық берілді
Өзбекстан президенті Шавкат Мирзиёев Ташкентте Парижде өткен Олимпиада ойындарының чемпиондары мен жүлдегерлеріне сыйлықтар табыстады. Бұл туралы Stan.kz ақпарат агенттігі хабарлайды.
Фото: instagram.com/boxinguzbekistan_official
Париж Олимпиадасынан Өзбекстанның 8 спортшысы алтынмен оралды. Олимпиаданың бейресми командалық жарысында Өзбекстан алғаш рет 13-орынға тұрақтады.
Ел президенті Олимпиада ойындарында чемпион атанып, жүлделі болған боксшыларды марапаттады. Өзбекстан үкіметі чемпион атанған 8 спортшының әр қайсысына 200 000 доллар көлемінде ақшалай сыйлық, Tahoe маркалы автокөлігін және екі қабатты коттедждің кілтін табыстады.
Күміс медаль жүлдегерлері 100 мың доллар, BYD көлігі және пәтерге ие болды. Ал қола жүлде иеленген спортшыларға 50 мың доллар ақшалай сыйақы мен BYD маркалы автокөлігі табыс етілді.
Еске салайық, Париждегі Олимпиадада Өзбекстан спортшылары 8 алтын, 2 күміс және 3 қола медаль жеңіп алды.
Бұған дейін Ермахан Ыбрайымов өзбек боксшыларының жетістігіне қуанып, құттықтаған еді.