Кәсіпкерлер ғимараттың құрылысына әрқайсысы өз қалтасынан кем дегенде 7 миллион теңгеден қаржы құйғандарын айтады. Кейін басшылық ауысып, не ақшасыз, не орынсыз қалдық деген олар ашуларын жасырмайды. Амалын таппаған олар полицияға да шағым түсірген.

14 жылдан бері кәсіпкерлікпен айналысатын Айгүл Нұржауованың бүгінде мазасы жоқ. Тапқан-таянғанын балаларынан аямайтын келіншек жаңа павильоннан орын алу үшін 10 млн теңге қаражат құйған.

“Өткен жылы қазан айынан бастап бізге жаңа павильонда орын сатылады деген әңгіме шығып, біз соған ақша құйдық, әркім әртүрлі сомада. Біреу 5 млн, біреу 10 млн берді. Өз басым 10 млн құйғам, жылы жерде тұрайық деп. Қазір өте суық жерде тұрып жатырмыз. Өз орнымызды алсақ деп талап қоямыз”, – дейді кәсіпкер Айгүл Нұржауова.

Кәсіпкерлердің бас ауруына айналған сауда нысанының құрылысы осыдан екі жыл бұрын басталған. Аумағы 28 мың шаршы метр. Саудагерлер бұл жерден орын алу үшін 2 млрд теңге қаражат жұмсағанын айтады. Саудагерлердің айтуынша, құрылыс қысқа дейін аяқталуға тиіс болған. Алайда басшылық ауысып, жаздан бері тұралап қалған. "Бұрынғы директор Данияр Әлпиев алған ақшамызды қайтармақ түгілі, келісімшарт та жасаспады" деп қапаланып отыр.

“Мен үш орын алдым. Жалпы мөлшермен 20 миллиондай құйдым. Келген кезде бағасын 12 миллион деді. Келісімшарт сұрап едік, чек берді де, келісімшартты "әне береміз", "міне береміз" деп, сол күйі бермеді, – дейді наразылығын білдірген тағы бір кәсіпкер Әлима Нұрмұхаммед.

"Алтын Орда" базарында жабық ғимаратқа көшуге қарсы саудагерлер әкімшілік өкілдеріне шабуыл жасады

Министр "Алтын Орда" базарындағы заңбұзушылықтар үшін Болат Назарбаев не себепті жауапқа тартылмағанын түсіндірді

300-ден астам кәсіпкер әр орынға кемі 7 миллион теңгеден құйған. Одан бөлек, жердің иесіне төленетін ай сайынғы жалдау ақысы бар. Олар ауданның полициясына да шағымданған. Бірақ нәтиже жоқ.

“Қылмыстық іс қозғалды, бірақ баяу жүріп жатыр. Бұл жерде кішігірім іс емес, бұл жерде тергеу тобы құрылу керек еді. Негізі тергеу тобында екі-үш тергеуші болу керек еді. Сондықтан тергеуге көңіліміз толмай отыр. Өйткені ақша қайда кеткенін білмей жатыр. Жұмсалған ақша қайда кетті? Әлпиев ешқандай түсініктеме бермейді”, – дейді адвокат Бауыржан Рахалиев.

Күнделікті шай-пұлының ақысын осы жерден тауып жүргендер енді қайда барарын білмей дал. Ал жаңа келген басшылық құрылысты жалғастыруға қайта кірісіп жатқанын айтты.

“Бұл жұмыс не үшін созылды, бұл жерде алдында "Алдан строй" деген құрылыс компаниясы болды. Негізі техжоспар бойынша жұмыс атқарылмады. Олармен келісімшарт бұзылып, жаңа құрылыс компаниямен кірді. Енді сол компания техжоспарымен алдағы уақытта құрылысты дер кезінде бітіруге өз үлесімізді қосамыз”, – деп түсіндіреді "Алтын орда" базары атқарушы компаниясының заңгері Ізбасар Өтеулин.

Даулы мәселенің жай-жапсарын полициядағылар да түсіндірмеген. Десе де сатушылар тиісті орындарына жайғасып, саудамызды жүргіземіз деп үміттенеді.

Талқылау