Жетісу облысында сот сараптамасы институтының экс-директоры марқұмның туыстарынан пара алған
Талдықорған қалалық соты Жетісу облыстық сот сараптамалары институтының бұрынғы директоры Жеңіс Әубәкіровке қатысты үкім шығарды. Бұл туралы Stan.kz ақпарат агенттігі хабарлайды.
Сот оны мәйітті сот-медициналық сараптамасыз беру үшін марқұмның туыстарынан пара алғаны үшін кінәлі деп таныды.
Сот мәліметінше, биылғы жылдың 9 мамырында сол күні мәйітханада сот сарапшысы ретінде кезекшілікте болған Әубәкіров қаза тапқан адамның туыстарымен кездескен. Олар отбасының діни ұстанымдарын алға тартып, мәйітті сот-медициналық сараптама жүргізбей беруді сұраған.
Іс материалдарына сәйкес, институт директоры тергеушінің сот-медициналық сараптама тағайындау туралы қаулысы болғандықтан, сараптама жүргізбей бұл мәселені шешу мүмкін еместігін мәлімдеген.
Алайда кейін марқұмның туыстарының мәйітті аштырмау үшін кез келген шартқа дайын екенін пайдаланып, олардан 200 мың теңге талап еткен.
Тергеу барысында анықталғандай, алдымен Әубәкіровке ештеңе деместен екі саусағын көрсеткен. Марқұмның туысы оның нені меңзегенін сұрағанда, ол 200 мың теңге керек екенін түсіндірген. Осы ақшаға мәйітке сот-медициналық сараптама жүргізбей, денені беруге уәде еткен.
Өздерінде мұндай сома болмағандықтан, марқұмның туыстары уақыт беруді сұраған. Әңгімеден кейін олар Жетісу облысы бойынша ұлттық қауіпсіздік комитеті департаментіне арызбен жүгінген.
Осыдан кейінгі оқиғалар ұлттық қауіпсіздік комитеті қызметкерлерінің бақылауымен өткен. Марқұмның туыстары мәйітханаға қайта келген кезде Әубәкіров мәйітке шынымен де сот-медициналық сараптама жүргізілмегенін көрсетіп, келісілген ақшаны тағы да талап еткен.
Алғашында оған 80 мың теңге ұсынылғанымен, ол одан бас тартып, толық 200 мың теңгені беруді талап еткен.
Біраз уақыттан кейін марқұмның туыстары ақшаны тапсырған. Параны алған сәтте Әубәкіровті ұлттық қауіпсіздік комитетінің қызметкерлері ұстаған.
Сот отырысында айыпталушы өз кінәсін толық мойындап, жасаған ісіне өкініш білдірді және өзіне бас бостандығынан айыру жазасын тағайындамауды сұрап, айыппұл төлеуге дайын екенін мәлімдеді.
Жаза тағайындау кезінде сот айыпталушының кінәсін мойындауын, өкінуін, бұрын сотталмағанын және кәмелетке толмаған балаларының бар екенін жеңілдететін мән-жайлар ретінде ескерді. Ал кәсіби антын бұзуы ауырлататын мән-жай деп танылды.
Нәтижесінде Жеңіс Әубәкіров алған пара сомасының отыз еселенген мөлшеріне тең 6 миллион теңге көлемінде айыппұл төлеуге міндеттелді.
Сондай-ақ ол өмір бойына мемлекеттік қызметте, мемлекеттік ұйымдарда және квазимемлекеттік сектор субъектілерінде қызмет атқару құқығынан айырылды.
Бұдан бөлек сот сотталушыдан жәбірленушілерге өтемақы қорына 86,5 мың теңге өндіру туралы шешім шығарды.
Жедел эксперимент аясында берілген 200 мың теңгені өтініш берушіге қайтару туралы қаулы қабылданды.
Еске салсақ, бұған дейін Алматы облысында пара ретінде екі iPhone алған салық қызметкерлері 100 миллион теңгеден астам айыппұл арқалағаны туралы жазған едік.
