Зеленский Ресеймен жасалуы мүмкін бейбіт келісімді сипаттады
Украина президенті Владимир Зеленский Ресеймен келісім екі құжаттан тұруы мүмкін екенін айтты. Бұлар – Украинаның қауіпсіздік кепілдігі мен Киев пен Мәскеу арасындағы қарым-қатынас туралы екенін жеткізді, деп хабарлайды Stan.kz ақпарат агенттігі.
"Ресеймен бітім шарты екі құжаттан тұруы мүмкін. Оның бірі Украинаның қауіпсіздік кепілдігіне, екіншісі Ресей Федерациясымен тікелей қарым-қатынасына қатысты болуы керек", – деп келтіреді Strana.ua порталы Зеленскийдің сөзін.
Зеленский Ресейдің осы мәселелердің барлығы қамтылған бір құжатта болғанын қалайтынын айтты.
“Алайда қазір Украинаның қауіпсіздігіне кепілдік беру бір мәселе болса, Ресеймен келісімге келу – бөлек мәселе”, – деді Зеленский.
Зеленский сондай-ақ Мариупольдегі украин әскері жойылған жағдайда Мәскеумен келіссөз жүргізбейтінін айтты.
Ресейлік және украиналық делегациялар келіссөздердің бірнеше кезеңін өткізіп, соңғы бетпе-бет кездесу 29 наурызда Ыстамбұлда өткен болатын. Онда Киев Мәскеуге жағдайды реттеу бойынша жазбаша ұсыныстар берді.