"Жәбірленушіден айыпталушыға айналдым": Блогер BikaBreezy көршісімен болған дауда ақталып шықты

BikaBreezy лақап атымен танымал әнші Биназир Ермағанбетова көршісімен арадағы бір жылдан астам уақытқа созылған сот дауы аяқталғанын мәлімдеді. Оның сөзінше, сот әншіні көршісіне жеңіл дене жарақатын келтірді деген айып бойынша ақтаған. Бұл туралы Stan.kz ақпарат агенттігі хабарлайды.

Биназирдің айтуынша, жанжал былтыр қаңтарда үйінің ауласында басталған. Сол кезде көршісі оған тап беріп, күртесінен ұстап, жұлқылап, кейін бетінен жұдырықпен ұрған.

Әнші болған жағдайдан кейін полицияға жүгінген. Алғашқы сот процесінде ер адам кінәлі деп танылып, оған 70 мың теңге айыппұл салынған.

Алайда бірнеше аптадан кейін істің бағыты өзгерген. Биназирдің сөзінше, көршісі дене жарақатын алғаны туралы сот-медициналық сараптама қорытындысын ұсынып, енді оның үстінен арыз жазған.

“Осылайша жәбірленушіден өзім айыпталушыға айналдым”, – деп жазды ол.

Оқыңыз

Қазақстандық блогер BikaBreezy Қытайда "Жылдың танымал әні" жүлдесін алды Оқыңыз

Әншінің айтуынша, айыптау актісінде ол жерде жатқан кезде, көршісі үстінен тізесімен басып, буындырып жатқан сәтте ер адамға қасақана зиян келтіру туралы ниет пайда болды деген тұжырым болған.

Биназир мұндай айыппен келіспей, көршісіне өзі шабуыл жасамағанын, керісінше қорғануға мәжбүр болғанын дәлелдеуге тура келгенін айтты.

“Маған көршіме шабуыл жасамағанымды, тек өзімді қорғағанымды дәлелдеуге тура келді”, – дейді ол.

Оның сөзінше, іс материалдарында куәгерлердің жауаптары, медициналық құжаттар және алғашқы сот отырысының материалдары болған. Сол деректерді қараған сот Биназир Ермағанбетованы кінәсіз деп таныған.

Әнші бұл жаңалықты әлеуметтік желідегі парақшасында бөлісіп, ұзаққа созылған дауға нүкте қойылғанын жазды.

“Көршіммен болған оқиғаға нүкте қоямын”, – деді ол.

Еске салайық, бұған дейін Биназир Ермағанбетова көршісінің өзін ұрып-соққанын айтып, полицияға шағымданған еді. Кейін ер адам да әншінің үстінен қарсы арыз түсіріп, соның негізінде оған қатысты қылмыстық іс қозғалды.