Алматыда отқа оранған жаңа үй өртке мүлде дайын болмай шықты: Тұрғындар құрылыс компаниясына наразылығын жеткізді
Түнде Алматыда екінші қабаттағы пәтерден өрт шықты. Тұрғындар көшеге үй киімімен қашып шығып, құтқарушыларды шақырған. Бұл туралы Stan.kz ақпарат агенттігі КТК арнасына сілтеме жасап хабарлайды.
Фото: Видеодан алынған скрин
Түнде келген тілсіз жау 13 қабатты үйдің тұрғындарын қатты шошытты. Тұрғындардың айтуынша, бүкіл кіреберіс қою түтінге оранған. Төтенше жағдайдан кейін үй иелері құрылыс компаниясына айтылатын шағымдардың толық тізімін жинақтады. Олар көпқабатты үйдің іс жүзінде жылынбайтынын мәлімдеді. Сондай-ақ өрт кезінде түтін шығару жүйесінің жұмыс істемегенін айтуда. Арнайы қалқандарда өрт сөндіру құралдары болмаған.
"Мен жетінші қабатта тұрамын. Түнгі сағат 2:30-да дабыл соғылды. Өрт сөндірушілер бізге сыртқа шығу керегін айтты. Аязды түнде баламмен далаға шықтым. Біздің басқарушы компанияларымыз қайда? Ешкім ештеңе істемейді. Терезелердің жартысы, балкондардың бәрі сынған", – деді тұрғын Эльмира Еренчина.
Өрт екінші қабаттағы пәтерден шығып, 12 шаршы метрлік дәлізді толығымен шарпыған. Шошынған тұрғындар шұғыл түрде өрт сөндірушілерді шақырған. 35 құтқарушы оқиға орнына дереу жетіп, бір сағаттың ішінде өртті сөндірген.
Зақымдалған пәтердің қабырғалары мен төбелері қара түске боялған. Үй иесі Біржан Баяқышов мұнда қарт анасымен тұратынын айтты. 71 жастағы кейуана қою түтіннің арасында қала жаздаған. Ол күйік иісін сезіп, үйінен ұйқы киімімен шығып, көршілерін оятқан.
"Түтіннің диспетчерлік бөлмеден шыққанын байқадым. Анам қорқып, подъезге жүгіріп шығып, көршілерге өрт туралы ескерту жасады. Мен сырт киімсіз, ештеңесіз шығып кеттім. Қазіргі таңда анамның да, менің де жағдайым жақсы. Бұл үйдің басты мәселесі сатып алғаннан бері еш жылу көрмеді. Өте суық. Барлық үй жылытқышпен отыр", – деді Біржан Баякышов.
Ұйқысыз түннен кейін пәтер иелері құрылыс компаниясына шағымын білдірді.
"Дабыл барлық қабаттарда жұмыс істемеді. Екінші қабатта өрт болды, ал мен 12-де тұрамын. Біздің айналамыздың бәрін түтін басты. Өрт сөндірушілерге рақмет. Есікті қағып, бізді эвакуациялады. Барлық қалқандарда шланг жоқ. Менеджерде кілт болғанымен, ол телефонға жауап бермеді. 12-қабатта кішкентай балалары бар отбасылар да тұрады", – деді тұрғын Полина Шиманская.
Алайда құрылыс компаниясының өкілдері өздерін кінәлі санамайды. Әзірлеуші тұрғын үйдегі автоматты өртке қарсы қорғаныс уақытылы жұмыс істегенін айтты. Бірақ бұл жағдайда олар жүйені тексеруге уәде берді.
"Тұрғын үй кешенінде автоматты өрттен қорғау, түтін шығару жүйесі, ескерту жүйелері бар. Эвакуациялау жоспары әзірленді. Тұрғын үй кешенін пайдалануға қабылдау кезінде өрт сөндіру техникасы толық күшінде болды. Қазіргі таңда мамандар өрттің себебін анықтап жатыр, құрылыс салушы да өрт қауіпсіздігі бойынша қосымша кешенді тексеру жүргізіп жатыр", – деді Qazaq Stroy құрылыс компаниясының өкілі Болат Әбенов.
Зақымдалған пәтердің иесі уақытша туыстарының үйіне қоныстанған. Ал жауапты қызметтер өрттің шығу себептерін анықтауға кірісті.
Айта кетейік, бұған дейін Астанада жиһаз цехында өрт шыққаны туралы жазған едік.