Үлкен Алматы көліне барар жол үш жылға жабылады
Үлкен Алматы көліне баратын жолды үш жылға жабу жоспарланып отыр. Алматы туризм басқармасы бастығының орынбасары Марат Айнабековтің айтуынша, қазіргі уақытта жолда селден қорғану бөгеттерінің құрылысы жүріп жатыр, ол шамамен үш жылға созылады, деп хабарлайды Stan.kz ақпарат агенттігі.
«БАО-ға апаратын жол туралы мәселе. Бүгінде ол жерде селден қорғаныс бөгетінің құрылысы жүріп жатыр. Ол шамамен үш жылға созылады. Сондықтан жолды ашу мәселесі кейінге қалдырылды және селден қорғайтын бөгеттер аяқталғаннан кейін ғана ашылады.
Сонымен қатар, қазір онымен жүруге тыйым салу туралы мәселе туындайды. Төтенше жағдайлар министрлігі бұл жолмен жүру қауіпті дейді», - деді Алматы туризм басқармасы бастығының орынбасары Марат Айнабеков Қазақстан туристік қауымдастығы ұйымдастырған вебинарда.
Өз кезегінде Қазақстан туристік қауымдастығының директоры Рашида Шайкенова сол жолдың бойында Аюсай шатқалындағы келушілер орталығына бару да күмән тудыратындығын атап өтті.
«Қазіргі уақытта біз төтенше жағдайлар министрлігімен келіссөздер жүргізіп жатырмыз, біз балама жолды сұраймыз, туристік орындар бар екенін және ішкі туризмді дамыту керек деп түсіндіреміз. Бірақ мәселе әлі келіссөздер сатысында», - дейді Алматы туризм басқармасының өкілі.
2020 жылғы наурызда барлық учаскелерде ықтимал қауіп төндіретін сайлар мен көшкіндердің пайда болуына байланысты БАО-ға жол белгісіз уақытқа жабылды. Қазіргі уақытта туристер Үлкен Алматы көліне жаяу ғана жете алады.
«Алматы қаласында туризмді дамыту» вебинарында қатысушылар проблемаларды талқылап, Алматыдағы туризм индустриясының жоспарлары туралы айтты. Іс-шараға Алматы қаласының туризм басқармасы, TIC Visit Almaty, Бас ботаникалық бақ, Qazaq Oner қолөнер орталығы, КГКП «Алматы қалалық музейлер қауымдастығы» және «Ақылды туризм орталығы» өкілдері қатысты.