Еуропалық Одақпен толық визасыз режим: Сыртқы істер министрлігі қазақстандықтар үшін шенген визасының жойылуы мүмкін екенін айтты

Қазақстан Еуропалық Одақпен визалық рәсімдерді жеңілдету және тұлғаларды реадмиссиялау туралы келісім бойынша сарапшылық деңгейдегі келіссөздерді аяқтады. Бұл туралы Stan.kz ақпарат агенттігі хабарлайды. 

Бұл туралы сыртқы істер министрлігінің ресми өкілі Ерлан Жетібаев мәлімдеді. Оның айтуынша, Қазақстан азаматтары үшін визалық талаптарды жеңілдету жөніндегі келісім жобалары бойынша консультациялар аяқталған. 

"Келісімдер дайын болған кезде қол қойылады. Енді тараптар келісімдерге қол қоюға дайындық бойынша ішкі мемлекеттік рәсімдерге көшті. Яғни, біздің жағдайда республика ретінде біз өз тарапымыздан тиісті рәсімдерді жүргіземіз, ал еуропалық тарап Шенген кеңістігі аясында барлық мемлекеттермен бірге рәсімдер өткізеді. Сондықтан бұл белгілі бір уақытты алады", – деді Жетібаев.

Оқыңыз

"Брюссельге нақты мақсатпен келдім": Тоқаев Еуропалық Одақ басшыларымен келіссөз жүргізді Оқыңыз

Министрлік өкілі Еуроодақпен визасыз режим туралы келісімнің жасалу мүмкіндігін де жоққа шығармады. Ол қазақстандықтарды алдымен визалық режимді жеңілдету туралы келісімді күтуге шақырды, өйткені тек содан кейін ғана толық визасыз режим бойынша келіссөздерге көшуге болады.

"Келісімге қол қойып алайық. Бұл біз үшін де, еуропалықтар үшін де үлкен қадам болады. Бұл азаматтарымыздың сапар жасауына ықпал етеді. Осыдан кейін визасыз режим мәселесіне қайта ораламыз. Министрлік ретінде азаматтарымыздың шетелге сапарларын барынша ыңғайлы ететін келісімдер мен шарттарды жасау бағытында тұрақты түрде жұмыс істеп келеміз. Жұмыс барлық шетелдік әріптестермен жүргізілуде. Қол қойылған келісімдер де, біржақты келісімдер де бар", – деді Жетібаев.

Еске салсақ, бұған дейін Еуропалық комиссияның төрайымы Урсула фон дер Ляйен Тоқаевпен кездесуінде қазақстандықтар үшін визалық режимді жеңілдету туралы келісімге қатысты пікір білдіріп, келіссөздердің аяқталуға жақын екенін мәлімдеген еді.