“Бұрынғы министр айыптаушы тараптан, яғни прокурорлардың айыбын нақтылау үшін куәгер болып шақыртылмақ. Сот алдында бәріміз тек шындықты айтуымыз керек. Алексей Цой біздің сұрақтарға да жауап береді. Заң аясында жауап берсе, қорғаушы тараптың куәгері болады деп есептеймін. Біздің ешқандай байланысымыз жоқ. Бұл істің негізгі фигуранттары болғаннан кейін, қарым-қатынасымыз заңмен шектелген”, – дейді айыпталушы Елжан Біртанов.

Бүгін Елжан Біртанов пен тағы бір айыпталушы вице-министр Олжас Әбішев алтыншы рет судьяға қарсылық білдірді. Бұл жолы сот, процес барысында тілшілерге аудио және видеожазба таратуға тыйым салған болатын. Журналистерге тек сұрақ-жауапты көруге рұқсат етілген. Айыпталушы тарап бұған қарсы. Соттағы айтылған шындықтан барлығы хабардар болуы керек деп санайды олар. Әрі өздерінің "сүттен ақ, судан таза" екенін ақпарат құралдарының алдында дәлелдегісі келеді екен. Сондықтан, бұған рұқсат етпеген судьяға айыпталушы тарап сенімсіздік білдіріп отыр.

“Соңғы екі жылда қоғам ішінде мен ақша ұрлады деген пікір қалыптасты. Басында 127 миллион деді, сосын 500 миллион, былтыр 1,5 миллиард теңге шығын келтірді деді. Қоғам мені ұры деп ойлады. Сот басталып, тергеу басталғанда бұл айыптау дәлелденбеді. Міне осындай шын ақпараттар тарап кетпеу үшін бұқаралық ақпарат құралдарының түсіруіне, ақпарат таратуына тыйым салынып отыр. Өйткені о бастан жазықсыз адамдарды ақша ұрлады деп айыптағанын, тергеуде қателік болғанын жасырғысы келеді”, – дейді айыпталушы Олжас Әбішов.

Бұрынғы денсаулық сақтау министріне қатысты сот Елордада былтырдан бері жүріп жатыр. Тергеу органдарының мәліметінше, Біртанов пен оның орынбасары Олжас Әбішев жұмыс істемейтін платформаны қабылдаған. Сондай-ақ бір жылдан бері тергеліп жатқан экс-министр 2020-ші жылғы маусымда Тараздан Нұр-Сұлтанға ұшу үшін санавиация ұшағын пайдалану кезінде өкілеттіктерін асыра пайдаланды деп айыпталып отыр.

Талқылау