Сот материалдарға сәйкес, 8 ақпанда 19 жастағы қыз ағасымен бірге таксиге отырған. Церебральды сал ауруына шалдыққан баласы да жанында болған. Үшеуі жолда түсіп қалған.

"Сол кезде ол ағасына тумысынан аурушаң және есепте тұрған баласына қарай алмайтынын, көргісі келмейтінін айтып, оны өлтіруге ұсыныс жасаған. Келіспеген жағдайда өзіне-өзі қол жұмсайтынын айтқан. Ағасы қарындасының сөзіне келісіп, екеуі баланы өлтіруге бел буған", – делінген сот хабарламасында.

Осыдан кейін екеуі баланы алып, қала сыртындағы бұрынғы зауытқа қарай барған. Сол жерде қоқыс төгетін жер болған.

"Дәрменсіз баланы жерге жатқызып, қылқындырып өлтірген. Баланың жан тапсырғанына көз жеткізген. Одан кейін мәйітті жасырып, төбешіктің үстінде сырттай бақылап тұрған қарындасын алып, оқиға орнынан бой тасалағандары анықталды", – дейді сот мамандары.

Басы бір бөлек, денесі бір бөлек жатты: Сарқан ауданында куәгер бес жастағы қыз баланың денесін қалай тауып алғанын айтты

Cарқанда қоқыстан бес жастағы бүлдіршіннің денесі табылды: Анасы мен ағасы оны өлтіргендерін мойындады

Қазіргі кезде екеуі Қылмыстық кодекстің 99-бабының 3-бөлігімен ("Алдын ала сөз байласу арқылы жас баланы өлтіру") бойынша тергеліп жатыр. Күдіктілер жасаған қылмыстарын мойындап, үйқамақта ұстау бұлтартпау шарасын сұраған. Бірақ тергеу аяқталғанша екі ай мерзімге күзетпей ұстау санкциясы берілді. Қаулы заңды күшіне енген жоқ.

Айта кетсек, Алматы облысы Сарқан ауданында бес жастағы баланың мәйіті қоқыстан табылғанын жазған болатынбыз. Баланың басы шамамен бес метр жерден табылған. Құзырлы органның ақпаратына сәйкес, баланың анасы 2002 жылы туған Сарқан қаласының тұрғыны болып шықты. Баласын 2017 жылы, яғни 15 жасында дүниеге әкелген.

Талқылау