Бәзбіреулер Ресейден Қазақстанға заңсыз 251 тонна бидай кіргізбек болған
Ауыл шаруашылығы министрлігі Ресейден Қазақстанға 251 тонна бидайды заңсыз алып өтпек болғандар туралы мәлімдеді. Бұл туралы Stan.kz ақпарат агенттігі хабарлайды.
Фото: pixabay.com
Министрлік мәліметінше, 6 қыркүйекте Батыс Қазақстан облысының теміржол фитосанитарлық посттарында аумақтық инспекция инспекторлары Ресей Федерациясының Саратов облысынан келген 4 вагон бидайды (251 тонна) тауып, кері қайтарды.
Вагондар Талдықорғанға бағытталған.
“Бұл факт дәнді дақылдардың контрабандасы әрекеттерінің жалғасып жатқанын көрсетеді. Өсімдіктер карантині бойынша инспекторлар үздіксіз бақылау мен қадағалау жүргізіп, тексерулер жүргізіп, ақпаратты талдайды, ережелердің сақталуын қадағалайды және бұзушылықтарды анықтайды, бұл елдің фитосанитарлық қауіпсіздігін және азық-түлік қауіпсіздігін қамтамасыз ету үшін қажет”, – делінген хабарламада.
Сондай-ақ министрлік өкілдері ішкі нарықты қорғау және дәнді дақылдарды қайта экспорттау фактілерін болдырмау үшін 2024 жылдың 26 шілдесінде Қазақстан аумағына үшінші елдерден және ЕАЭО елдерінен келетін бидайдың барлық түрін әкелуге тыйым салу туралы шешім қабылданғанын еске салды. Тыйым 2024 жылдың 31 желтоқсанына дейін күшінде болады.