Jennifer Lopez, Backstreet Boys, Kanye West: Әлемдік жұлдыздарды шақыру құны қанша

Әлемдік жұлдызды Қазақстанға шақырудың құны миллиард теңгеге дейін жетеді. Мәселен, Backstreet Boys тобын елге әкелу шығыны 453 миллион теңгеден 1,36 миллиард теңгеге дейін бағаланған. Ал Jennifer Lopez, Kanye West пен Enrique Iglesias секілді әртістердің концертін ұйымдастыру қаншаға түсті? Stan.kz әлемдік жұлдыздарды Қазақстанға шақырудың қаржылық есебін зерттеді.

Әлемдік жұлдызды шақыру қанша тұрады?

2025 жылғы баспасөз кездесуінде First Media Group басқарушы директоры Әлфия Нұрғұмарова Backstreet Boys тобының гонорары 1–3 миллион доллар екенін растады. Бұл – әртістердің гонорары, концерттің толық бюджеті емес.

Jennifer Lopez пен Backstreet Boys концерттерін ұйымдастырған First Media Group компаниясы Stan.kz редакциясының ресми сауалына берген жауабында жобалардың нақты бюджетін жарияламады. Компания мұны әртістермен және халықаралық серіктестермен жасалған құпиялылық келісімдерімен түсіндірді. Компанияның айтуынша, концерт құны әртістің танымалдығына, оған деген сұранысқа, көрермен санына, гастроль кестесіне және техникалық талаптарға байланысты. Шетелдік орындаушыларға төленетін салық та жалпы шығынға қосылады.

Оқыңыз

“11 миллион теңге ұсынды”: Тараздық бойжеткен Шакираның концертте лақтырған көзілдірігін қағып алған Оқыңыз  

Ал “Астана Концерт” продюсері Мәлік Хасенов әлемдік жұлдыздардың концерт бюджетінің шамамен 70%-ы әртіс пен оның командасына, тағы 10%-ы техникалық жабдық пен райдерге жұмсалатынын айтқан. Қалған бөлігі салықтар мен ұйымдастыру шығындарына кетеді. Хасенов ұйымдастырушының табысын жалпы бюджеттің 3–5%-ы шамасында бағалайды. Оның есебінше, топтың концерті шығынсыз болуы үшін билеттердің шамамен 81%-ы сатылуы керек. Бұл – продюсердің тәжірибесіне негізделген есеп, барлық концертке ортақ көрсеткіш емес. Продюсердің айтуынша, Jennifer Lopez-тің гонорары 2012 жылдан бері шамамен 1,8 есе өскен. Алайда әншінің нақты гонорары келісімшарттағы құпиялылыққа байланысты жарияланбайды.

Басқа елдерде әлемдік жұлдыздарға қанша төлейді?

Әлемдік әртістердің гонорары туралы ашық келісімшарттар сирек кездеседі. Соның бір мысалы – Enrique Iglesias-тің 2015 жылы АҚШ-тың Мак-Аллен қаласында өткен концерті. Creative Artists Agency мен қала арасындағы келісімшартта әншіге бір сағаттық өнер көрсетуі үшін 485 мың доллар кепілдендірілген төлем қарастырылған. Бұдан бөлек, қала әкімшілігі әртісті Мексикадан чартерлік рейспен жеткізу, жердегі көлік және екі түнге арналған 24 қонақүй бөлмесін төлеу міндетін алған. Жергілікті дыбыс пен жарық жабдықтарын да ұйымдастырушы қамтамасыз еткен. Демек, 485 мың доллар – концерттің толық бюджеті емес, орындаушыға келісілген төлем ғана.

Ал Backstreet Boys тобына қатысты АҚШ-та жұмыс істейтін Celebrity Talent International booking агенттігінің ашық профилінде бастапқы шақыру ақысы 2–2,5 миллион доллар деп көрсетілген. Агенттік бұл нақты келісімшарт сомасы емес, бұрынғы тәжірибеге негізделген бағалау екенін ескертеді. Әртістің командасы, техникасы мен жол шығындары бұл сомаға кірмеуі мүмкін.

Бұл мысалдар әлемдік жұлдызды шақыру құны концерттің форматына, өтетін орнына және ұйымдастыру шарттарына қарай өзгеретінін көрсетеді. Сондықтан басқа елдегі гонорарды Қазақстандағы концерттің нақты бюджетімен салыстыруға келмейді.

Бір концерттің бюджетіне не кіреді?

Әлемдік жұлдыздың концертін өткізу үшін тек гонорар төлеу жеткіліксіз. Ұйымдастырушылар әртіс пен оның командасының жолы мен қонақүйін, сахна құрылысын, дыбыс пен жарық жүйесін, техникалық жабдықты, күзет пен медицина қызметін де қамтамасыз етеді.

Мұндай шараның ауқымын 2026 жылғы 15 тамызда Алматыда өткен Ye концерті көрсетеді. Алматы әкімдігінің мәліметінше, концертке дайындық бір айға созылған. Сахна мен техникалық жабдықтарды орнатуға бес күн кеткен. Қажетті техника 1 жүк ұшағымен және 7 еурофурамен жеткізілген. Қосымша жабдық Алматы, Астана және Мәскеуден әкелінген. Әртістің командасына арнап 17 шатыр мен 8 киім ауыстыратын бөлме дайындалған. Ал концерт күні стадионда қауіпсіздік, полиция, медицина, техника және қызмет көрсету салаларын қосқанда 4 400-ден астам адам жұмыс істеген.

First Media Group компаниясы Stan.kz редакциясының ресми сауалына берген жауабында концерттердің нақты бюджетін жариялаудан бас тартты. Компания мұны әртістермен және халықаралық серіктестермен жасалған келісімшарттардағы құпиялылық талаптарымен түсіндірді.

“Әрбір келісімшартта құпия ақпаратты жария етпеу жөніндегі қатаң міндеттемелер қарастырылған. Бұл талаптар жобалардың жалпы бюджеті, жекелеген шығыс баптарының сомалары мен пайыздық арақатынасы сияқты қаржылық ақпаратты жария етуге жол бермейді”, – делінген компанияның жауабында.

Қазақстанда концерт өткізу неге қымбат?

First Media Group өкілдері Қазақстанның негізгі гастроль бағыттарынан қашық орналасуы тасымал шығындарына әсер ететінін атап өтті.

“Іс жүзінде Қазақстандағы бір концертті өткізуге қажетті логистикалық шығындар мен уақыт ресурстары кейбір жағдайларда Еуропада бірден бірнеше концерт ұйымдастыруға кететін шығындармен шамалас болуы мүмкін”, – делінген компания жауабында.

“Астана Концерт” продюсері Мәлік Хасеновтың сөзінше, үлкен концерттерге екі техникалық топ жұмылдырылады. Бірінші топ сахнаны орнату үшін концертке 10 күн қалғанда келеді. Жұмысы аяқталған соң келесі қалаға аттанып, концерт күні екінші топ жұмыс істейді. Яғни бір кештік шоудың артында ұзақ дайындық, техниканы тасымалдау және бірнеше мамандар тобының еңбегі бар.

Қазақстанға келген әлемдік жұлдыздар қанша көрермен жинады?

2025 жылы Қазақстанда Jennifer Lopez пен Backstreet Boys концерт берді. Jennifer Lopez 1 тамызда Астанада, 10 тамызда Алматыда өнер көрсетті. Ал Backstreet Boys 19 қыркүйекте Алматыда, 21 қыркүйекте Астанада сахнаға шықты.

Алматы әкімдігінің мәліметінше, Jennifer Lopez-тің концертіне 27 мың адам жиналған. Оның шамамен 7 мыңы 35 елден келген турист. Билет бағасы 40–180 мың теңге аралығында болды.

Астана әкімдігінің дерегіне сәйкес, Backstreet Boys концертіне 45 елден 12 мыңнан астам турист келген. Продюсер Мәлік Хасеновтың айтуынша, елордадағы шоуды жалпы 27 мыңнан астам адам тамашалаған. Ол сондай-ақ Jennifer Lopez-тің Астанадағы концерті әншінің гастрольдік турындағы 18 қаланың ішінде алғашқы болып аншлаг жинағанын айтқан.

2026 жылғы 15 тамызда Алматыда Ye концерті өтті. Қала туризм басқармасының басшысы Ғалия Тоқсейітованың мәліметінше, стадионға 31 мың көрермен жиналып, 50-ден астам елден 7 700-ге жуық турист келген. Олардың шамамен 2 мыңы концерт үшін арнайы келген шетелдік жанкүйерлер.

Ал қыркүйекте Enrique Iglesias Астана мен Алматыда концерт берді. Freedom Ticketon платформасындағы мәлімет бойынша, екі қалада да билеттер 45 мың теңгеден басталған.

Концерт ұйымдастырушылары ақшаны қайдан табады?

First Media Group мәліметінше, концерттің негізгі кірісі – билет сатылымы. Демеушілік пен серіктестік келісімдер ұйымдастыру шығындарының бір бөлігін жабуға көмектеседі, бірақ компания үшін жеке пайда көзі саналмайды. Ал VIP аймақтар қызмет көрсету инфрақұрылымының бөлігі ретінде қарастырылады.

Мәлік Хасенов топ әртістерінің концертінде шығынды жабу үшін билеттердің шамамен 81%-ы сатылуы керек деп есептейді. Ал First Media Group-тың түсіндіруінше, залалсыздық нүктесіне жетудің бірыңғай пайызы жоқ: ол әр концерттің бюджеті мен билет сатылымына қарай жеке есептеледі.

Әлемдік жұлдыздар концерті қала экономикасына қанша табыс әкеледі?

Концерттен түсетін қаржы тек ұйымдастырушының табысымен шектелмейді. Шетелден келген көрермендер қонақүйге орналасып, мейрамханаға барады, көлік қызметін пайдаланады. Соның нәтижесінде қаладағы қызмет көрсету салаларының айналымы артады.

Алматы әкімдігінің Jennifer Lopez концертіне қатысты есебіне сәйкес, шетелдік туристер қалада 5 миллиард теңгеден астам қаражат жұмсаған. Олар Алматыда орта есеппен 3,5 күн болып, күніне шамамен 440 доллар шығынданған. Концерт күні стадиондағы фуд-корттың түсімі 15 миллион теңгеге жеткен. Ал көрермендердің жалпы шығыны мен жанама түсімдерді қосқандағы қала экономикасына әсері 10 миллиард теңгеден асқан. Әкімдік бюджетке түсетін салықты шамамен 600 миллион теңгеге бағалаған.

Бұл сомалар ұйымдастырушының табысы емес, қала экономикасына түскен қаражатты көрсетеді.

Алматы қаласы туризм басқармасының басшысы Ғалия Тоқсейітованың мәліметінше, 2026 жылғы 15 тамызда өткен Ye концертінен кейін туристер ағынының экономикалық әсері шамамен 5 миллиард теңге болған. 13–16 тамыз аралығында қаладағы қонақүйлер мен өзге орналастыру орындарының орташа жүктемесі 98%-ға жеткен.

Қазақстан Ұлттық банкінің 2025 жылғы есебінде Jennifer Lopez пен Backstreet Boys концерттерінің қоғамдық тамақтану саласына әсері де бағаланған. Зерттеу бойынша, концерттер өткен кезеңде мейрамхана мен дәмхана қызметтерінің көлемі 5–11%-ға артқан. Астанадағы өсім 8,4% болған. Дегенмен Ұлттық банк Backstreet Boys концерті кезінде елордада Astana Finance Days шарасы да өткенін ескерткен. Сондықтан өсімге бірнеше іс-шара қатар әсер етуі мүмкін. Ал концерттердің бөлшек саудаға ықпалы айтарлықтай болмаған.

Қазақстан әлемдік жұлдыздар үшін тұрақты нарық бола ала ма?

Қазақстандағы концерт индустриясының көлемі өсіп келеді. Finprom дерегінше, 2025 жылы концерттік қызметтер көлемі 48,1 миллиард теңгеге жетіп, бір жылда 17,8%-ға артқан. Жыл ішінде 7,8 мың концерт өткізілген. Ұлттық статистика бюросының мәліметінше, 2026 жылғы 1 қаңтарда елде 67 концерттік ұйым жұмыс істеген. Бұл көрсеткіштерге әлемдік жұлдыздардың ғана емес, барлық концерттік іс-шаралардың қызметі кіреді.

Алайда шетелдік әртістерді жиі шақыру нарықтың мүмкіндігіне байланысты. Продюсер Мәлік Хасеновтың пікірінше, Қазақстан әзірге жылына төрт-бес ірі концертті ғана көтере алады. Себебі мұндай жобаларға миллиондаған доллар жұмсалады. Алғашқы үш концерт сәтті өткенімен, төртіншісі шығын әкелуі мүмкін. Мұндай жағдайда ұйымдастырушы бұрынғы жобалардан тапқан табысынан да айырылуы ықтимал.

Freedom Ticketon бақылау кеңесінің мүшесі, Freedom Holding Corp. стратегиялық кеңесшісі Виктория Торгунакова 2025 жылғы төрт стадиондық концертке сұраныстың жоғары болуын нарықта әлемдік жұлдыздарға деген қызығушылықтың ұзақ уақыт бойы жиналуымен түсіндірген. Оның айтуынша, бұл сұраныс тұрақты түрде қайталанады деген сөз емес: нарық сыйымдылығы артпаған, ал халықтың сатып алу қабілеті төмендеген.

Осылайша, әлемдік жұлдыздарды шақыру тек әртістің гонорарына емес, логистика, техника, сахна құрылысы, салық пен ұйымдастыру шығындарына да байланысты. First Media Group нақты концерттердің бюджетін жарияламағандықтан, Қазақстандағы мұндай жобалардың толық құнын дәл анықтау мүмкін емес. Ал ұйымдастырушының табысы мен концерттің қала экономикасына әсері – бір-бірінен бөлек көрсеткіштер.

Айта кетейік, бұған дейін Канье Уэсттің концерті ұйымдастырушыларды шығынға ұшыратқан.