Қазақстандық әйел 1 келі гашишпен Бали әуежайында ұсталды
Индонезияның Бали аралында 25 жастағы Қазақстан азаматы есірткі тасымалдады деген күдікпен ұсталды. Құқық қорғау органдары оның жүгінен салмағы 1,079 келі болатын күмәнді гашиш тапқан. Бұл туралы Stan.kz ақпарат ақпарат агенттігі Thebalitimes.com порталына сілтеме жасап хабарлайды.
Бали провинциясының Ұлттық есірткіге қарсы күрес агенттігі (BNNP Bali) мәліметінше, Қазақстан азаматының аты-жөні VM деген инициалдармен ғана жарияланған. Ол 4 тамызда Бангкоктан Денпасарға келген рейсті тексеру кезінде ұсталған.
Тергеу дерегіне сәйкес, күмәнді зат киімдер мен аксессуарлардың арасында тұрған чемодандағы пластик контейнердің ішіне жасырылған.
VM тергеушілерге чемоданды өзіне Қазақстаннан келген басқа бір қазақстандық әйел бергенін айтқан. Оның сөзінше, Балиге барған соң чемоданды бейтаныс адамға тапсыруы керек болған.
Алайда тергеу барысында әйел көрсеткен делдалдың Индонезиядан 2020 жылы шығып кеткені анықталған. Қазір оның Қазақстандағы байланыстары мен есірткі тасымалына қатысы болуы мүмкін өзге де адамдар тексеріліп жатыр.
Қазақстан азаматы күдікті ретінде қамауға алынып, Бали BNNP кеңсесінде ұсталып отыр. Оған Индонезияның 2009 жылғы №35 "Есірткі заттары туралы" заңының 111-бабы 1-тармағы бойынша айып тағылған.
Осы бап бойынша 4 жылдан 12 жылға дейін бас бостандығынан айыру жазасы қарастырылған. Тергеу жалғасып жатыр.
Еске салайық, бұған дейін Таиландтан Қазақстанға бөтеннің чемоданын ақшалай сыйақы үшін алып өтпек болған 22 жастағы қазақстандық бойжеткен ұсталған еді. Оның жүгінен жалпы салмағы 8,8 келі каннабис сығындысы табылып, Алматы қаласының соты оны есірткі контрабандасы мен аса ірі мөлшерде есірткі тасымалдағаны үшін 16 жылға бас бостандығынан айырды.
