Қазақстанда биыл ашылуға тиіс үш әуежайдың іске қосылуы 2027 жылға шегерілді
Үкіметтегі брифингте премьер-министрдің бірінші орынбасары Нұрлыбек Нәлібаев елдегі Зайсан, Катонқарағай және Кендірлі әуежайлары 2027 жылдың алғашқы жартыжылдығында жолаушыларды қабылдай бастайтынын мәлімдеді. Бұл туралы Stan.kz ақпарат агенттігі хабарлайды.
Оның айтуынша, Зайсан мен Кендірлідегі әуежайлардың құрылысын 2026 жылдың соңына дейін аяқтау жоспарланған. Ал Катонқарағайдағы әуежай 2027 жылдың ақпанында дайын болады. Құрылыс аяқталғаннан кейін нысандардың құжаттарын рәсімдеп, тиісті лицензия алу қажет.
"Келесі туристік маусымға қарай үш нысан да толыққанды жұмыс істеуі керек. Олар президенттің тапсырмасына сәйкес туризмді дамыту мақсатында салынып жатыр", – деді Нұрлыбек Нәлібаев.
Әуежайлардың құрылысы 2024 жылы басталған. Нәлібаевтың мәліметінше, Зайсандағы әуежай құрылысына шамамен 68 миллиард теңге, Кендірлідегі нысанға 69 миллиард теңге, ал Катонқарағайдағы әуежайға 89 миллиард теңге жұмсалады. Құрылыс барысын әкімдіктер күнделікті бақылап отыр.
Нәлібаев биыл маусым айында үш нысанның да құрылысымен танысқан.
Бұған дейін не белгілі болды?
Бұған дейін үкімет президент Жолдауын іске асыру жөніндегі жоспарды бекіткен еді. Құжатта Зайсан, Катонқарағай және Кендірлі әуежайларын 2027 жылдың мамырында пайдалануға беру жоспарланғаны көрсетілген. Ал Нұрлыбек Нәлібаев нысандардың толық іске қосылу мерзімін 2027 жылдың алғашқы жартыжылдығы деп атады.
Қазан айының басында Кендірлі әуежайының құрылыс жұмыстары 54%-ға, Зайсанда 95,3%-ға, ал Катонқарағайда 79%-ға орындалғаны хабарланған. Ол кезде үш әуежайдың құрылысын 2026 жылдың соңына дейін аяқтау жоспарланған еді.
Еске салайық, бұған дейін Вьетнамның Sun PhuQuoc Airways және Таиландтың Siam Wings Airlines әуе компаниялары Қазақстанға рейс орындау жоспарын жариялаған еді. Алайда ұшудың нақты мерзімі мен бағыттары әзірге белгісіз. Сонымен қатар биыл маусым айынан бастап Арменияның FlyOne Armenia және Өзбекстанның My Freighter (Centrum Air) әуе компаниялары Қазақстанға рейс орындай бастаған.
