Қазақстанда тұрғын үйлердің жанына көлік қоюға тыйым салына ма?: Министрлік желіде тараған ақпаратқа жауап берді
БАҚ пен әлеуметтік желілерде 2026 жылдың 1 шілдесінен бастап Қазақстанда тұрғын үйлердің жанына автокөліктерді тұраққа қоюға тыйым салынады деген ақпарат тарады. Бұл туралы Stan.kz ақпарат агенттігі хабарлайды.
Өнеркәсіп және құрылыс министрлігі бұл ақпараттың шындыққа сәйкес келмейтінін мәлімдеді.
"Өнеркәсіп және құрылыс министрінің “Қалалар мен елді мекендердің аумақтарын абаттандырудың үлгілік қағидаларын бекіту туралы” бұйрығы үйлердің жанында автокөліктерді тұраққа қоюға жаңа тыйым енгізуді қарастырмайды", – делінген министрлік хабарламасында.
Құжат Қазақстанның құрылыс кодексіне сәйкес қалалар мен ауылдарды абаттандыру қағидаларын жаңарту мақсатында әзірленген. Жаңа ережелерде автокөліктерді осы мақсат үшін бөлінген аймақтарда үйлердің жанында қоюға тыйым салатын нормалар қарастырылмағаны атап өтілді.
ОқыңызМинистрлік өкілдері енгізілген өзгерістер тек нақтылау сипатында екенін айтады.
Ережелердің 32-тармағында жеке тұрғын үйлердің іргелес аумағында сақтауға тыйым салынатын мүліктердің тізімі нақтылап көрсетілді. Бұған дейін заңда "өзге де жылжымалы заттар" деген жалпы тұжырым қолданылған болса, енді құжатта оларға автокөліктер, тіркемелер және арбалар жататыны жеке көрсетілген.
"Бұл жерде сөз жалпыға ортақ пайдаланылатын іргелес аумақта мүлікті қоймалау және ұзақ уақыт сақтау туралы болып отыр, көлік құралдарын белгіленген орындарда пайдалануына немесе тұраққа қоюына тыйым салынбайды", – делінген хабарламада.
Министрлік жаңа ережелер жол қозғалысын, көлік тұрақтарын, автотұрақтарды және автокөліктерді пайдалануды реттемейтінін атап өтті. Сондықтан үйлердің жанында көлік қоюға тыйым салынды деген мәлімдемелер құжаттың мазмұнына сәйкес келмейді.
Сондай-ақ министрлік азаматтарды тек ресми ақпарат көздерін пайдалануға және нормативтік-құқықтық актілерді қате түсіндіруге жол бермеуге шақырды.
Қазақстандық түрмелерде сотталғандар енді отбасымен видеотаксофон арқылы сөйлесе алады
