Қазақстанда қыз құрбысына күйеуінің ұрып-соққанын айтып, ақша сұраған: Келесі күні ол өлі күйінде табылды
Жамбыл облысы Меркі ауданында 19 жастағы әйел қаза болды. Содан кейін өзін-өзі өлтіруге итермелеу ісі бойынша сотқа дейінгі тергеу басталды. Бұл туралы Stan.kz ақпарат агенттігі хабарлайды.
19 жастағы Мадина Рашидқызы күйеуімен бірге Меркі ауданында тұрған. Ол түнде асылып қалған күйінде табылған. Мадина Өзбекстан азаматы, ал күйеуі Қазақстан азаматы болған. Олар шамамен екі жыл некеде тұрған және сегіз айлық бөпесі болған.
Өлім алдында Мадина құрбысына күйеуімен болған жанжал және ажырасу ниеті туралы айтқан.
Марқұмның досы Зейнеп Мұсахожанова онымен үш жылдай жақын араласыпты. Оның айтуынша, Мадина отбасылық жанжалдар туралы бірнеше рет хабарлап, күйеуінің оған қол көтеретінін айтқан. Сонымен қатар беті көгергенін көрген. Мадина құрбысына жарақаттарын фотоға түсіріп жіберіпті.
Соңғы жанжал шоколад үшін болса керек. Мадинаның құрбысына жазған хаттарында күйеуі қызына тәтті әкелгенін, ал оны Мадина жегені үшін күйеуі ұрғаны айтылады.
Келесі күні Мадина киімдерін жинап, күйеуінен кету ниетін хабарлаған.
Содан кейін ол 15 000 теңге қарыз сұраған. Зейнеп қажетті соманың жоқ екенін, сондықтан достарынан сұрауды шешкенін айтқан. Алайда Алматыдағы интернет мәселелеріне байланысты ол ешкіммен байланыса алмай, қажетті соманы таба алмаған. Кейінірек Мадинаның енесі оның қайтыс болғанын хабарлаған.
Сондай-ақ Мадина бұрын өзінің де, күйеуінің туыстарынан да көмек сұраған екен.
Зейнептің айтуынша, марқұмның анасы полицияға түсініктеме беріп жатыр, ал өзі әлі жауап алуға шақырылмаған.
Марқұмды жерлеу рәсімі 16 тамызда өтеді деп жоспарланған.
Жамбыл облыстық полиция департаментінің мәліметінше, қазір оқиғаның барлық мән-жайын анықтау үшін қажетті тергеу шаралары жүргізіліп жатыр.
