Тоқаев ҰБТ нәтижесіне тоқталып, Түркістан облысында білім сапасының мәз емесін мәлімдеді
Мемлекет басшысы Қасым-Жомарт Тоқаев Республикалық тамыз конференциясының пленарлық отырысында Түркістан облысындағы білім сапасына тоқталды. Бұл туралы Stan.kz ақпарат агенттігі хабарлайды.
Қасым-Жомарт Тоқаев білім беру саласындағы өңірлік айырмашылықтарға ерекше назар аударып, барлық аймақта оқушыларға сапалы білім алуға тең мүмкіндік жасалуы керегін айтты.
“Осы тұста Ұлттық бірыңғай тестілеудің биылғы нәтижелеріне тоқталғым келеді. Мәселен, Қызылорда, Солтүстік Қазақстан, Павлодар, Қостанай облыстарының, сондай-ақ, Астана және Алматы қалаларының түлектері жоғары көрсеткішке қол жеткізді. Ал Түркістан, Ұлытау, Атырау, Ақтөбе және Алматы облыстарындағы жағдай жақсы деп айту қиын”, – деді Мемлекет басшысы.
Президент, әсіресе, тиісті министрлік пен әкімдік Түркістан облысындағы ахуалға назар аударуы керек деп санайды.
Оның айтуынша, мұны PISA ұйымының зерттеуі де Түркістан облысындағы білім сапасының мәз емес екенін көрсетті. Бұл – аймақтың оқу-ағарту жүйесінде олқылықтар әлі бар деген сөз.
“Бірақ облыстағы жағдайды дағдарыс деп те айтуға болмайды. Мәселе мынада: облыста білім алып жатқан оқушылардың 75 пайызға жуығы ауылда тұрады. Олардың жан-жақты және қарқынды дамуы үшін қолайлы жағдай жасалуға тиіс. Қажетті инфрақұрылым салып, шалғай елді мекендерге мықты мамандарды тартқан жөн. Бұл – Үкіметтің және әкімдіктердің алдында тұрған жедел міндет, жұмысты жоспарлы түрде тездетіп атқарып, нақты нәтижелерге қол жеткізу қажет”, – деді Президент.
Мемлекет басшысы Үкіметке жалпы, төмен нәтиже көрсеткен барлық аймақтың әкімдері бұл бағыттағы жұмысты күшейтуді тапсырды.
Қазақ тілін қорлаған бұрынғы Ресей азаматы 15 күнге қамалды
