"Оның істегенін ақтау мүмкін емес": Айсәуле Бақытбек әкесімен қарым-қатынасын айтты
Танымал блогер, желі жұлдызы Айсәуле Бақытбек әкесі Бақытбек Есентаевпен араласатынын айтты. Бұл туралы Stan.kz ақпарат агенттігі хабарлайды.
Фото: https://www.instagram.com/aissaulebakytbek/
Блогер әкесіне қатысты сұраққа жауап беріп, оқырмандарына ой салды.
“Мен әкеммен түскен фотомды жарияласам, маған кейбір оқырмандарым: “Жарайсың, араласқаның жақсы” деп пікір жазады. Олардың маған жұмсартып айтқан пікірлері ұнамайды. Әкемнің ісі – ақтауға келмейтін дүние. Ешқандай жағдайда. Бұл сурет және біздің араласатынымыз, оны аз да болса түсінетінімді немесе ақтағым келетінін білдірмейді. Бұл олай емес”, – деп бастады әңгімесін блогер.
Айтуынша, ата-анасы ажырасқаннан кейін әкесімен бұрынғыдай қарым-қатынаста қалу оңайға соқпаған.
“Бұл қарым-қатынасты ұстау маған оңай емес. Көп еңбек пен күш-жігерді қажет етеді. Оны ол тіпті білмеуі де мүмкін. Мен кейбір дүниелерді кешіруге болмайтынына сенемін. Бірақ оған қоса, мен сол адамның арқасында осы өмірде бар екенімді білемін. Сондай-ақ әкем маған көп жыл бойы өте жақсы әке болды. Иә, адам қорқынышты әрекеттерден кейін де балалары және немерелерімен сөйлесуге құқылы. Өйткені, бұл – өмір. Ал өмірдің қыры шексіз көп. Көбіңіз менің өмірімнің қыр-сырын және менің іс-әрекеттерімді түсіне алмайсыздар. Мен де сіздерді түсіне алмайтыным сияқты", – деп жазды Айсәуле Бақытбек.
Еске салайық, блогердің әкесі алты жыл абақтыда отырып, бостандыққа шыққан еді.