Тарихи сәт: Qarmet компаниясында жаңа №8 кокс батареясын қалау жұмыстары басталды

Qarmet металлургиялық комбинатында №8 кокс батареясының отқа төзімді қаптамасын қалау жұмыстарының басталуына арналған салтанатты рәсім өтті. Болашақ агрегаттың алғашқы кірпіштерін "Qarmet" АҚ Басқарма төрағасы Петр Трушин мен ACRE Coking & Refractory Engineering Consulting Corporation компаниясының бас директорының орынбасары Ван Миндэн қалады. Салтанатты шараға құрылысшылар, инженерлер, кокс-химия өндірісінің мамандары және жобаны іске асыруға тікелей қатысып отырған компания қызметкерлері қатысты.

Қалау жұмыстарының басталуы Qarmet-тың ең ірі инвестициялық жобаларының бірі үшін жаңа тарихи кезеңнің басталғанын білдіреді. Комбинатта мұндай жаңа кокс өндірісі қуаттарын салу жұмыстары ондаған жылдардан бері алғаш рет қолға алынды. Іс жүзінде бүгінде кәсіпорында 1960-жылдардан бері жұмыс істеп келе жатқан агрегаттардың орнын басатын кокс-химия өндірісінің жаңа буыны қалыптасуда.

№8 және №9 кокс батареялары кәсіпорындағы ең заманауи әрі өнімділігі жоғары агрегаттардың қатарында болады. Кешеннің жалпы жобалық қуаты жылына 1,5 млн тонна құрғақ кокс өндіруге жетеді. Жаңа қуат жобалық көрсеткіштеріне шыққаннан кейін №1–4 батареяларды кезең-кезеңімен пайдаланудан шығару жоспарланып отыр.

"Qarmet үшін жаңа кокс батареяларының құрылысы – шын мәнінде тарихи оқиға. Комбинатта ондаған жылдардан кейін алғаш рет осындай ауқымдағы жаңа кокс өндірісі қуаттары құрылып жатыр. Бүгін біз алғашқы отқа төзімді қалау жұмыстарын бастап отырмыз. №8 кокс батареясын 2027 жылдың қарашасында іске қосуды жоспарлап отырмыз. Бұл жобаны жүзеге асырып жатқан Qarmet қызметкерлеріне және кәсібилігі, жауапкершілігі мен жоғары инженерлік сараптамасы үшін серіктесіміз ACRE компаниясына алғыс айтамын", – деді Петр Трушин.

Жобаның маңызы бір ғана өндірістік учаскені жаңғыртумен шектелмейді. Кокс домна өндірісіндегі негізгі компоненттердің бірі болғандықтан, жаңа батареялар домна өндірісін кокс өнімдерімен қамтамасыз етудің сенімділігін арттырып, Qarmet-тың өзіндік шикізат базасын нығайтуға және бүкіл металлургиялық циклдің тұрақтылығын қамтамасыз етуге мүмкіндік береді.

Жаңа агрегаттар заманауи технологиялық шешімдер негізінде салынып жатыр. Кокс массасын біркелкі қыздыру дайын кокстың сапасына оң әсер етеді деп күтіледі. Ал газды тазартудың заманауи жүйесі өндірістің қоршаған ортаға әсерін азайтуға мүмкіндік береді. Ескі қуаттарды жаңарту өндірісті автоматтандыру деңгейін, өнеркәсіптік қауіпсіздік пен тиімділікті арттырып, шығындарды азайтуға және еңбек жағдайларын жақсартуға мүмкіндік береді.

Қазір басталған отқа төзімді қалау кезеңінің де маңызы ерекше. №8–9 батареяларын салу үшін шамамен 55 мың тонна отқа төзімді материал жеткізу көзделген. Бұл материалдар жоғары температура жағдайында жұмыс істеуге арналған және болашақ агрегаттардың беріктігін, герметикалығын және ұзақ уақыт қызмет етуін қамтамасыз етуі тиіс.

"ACRE компаниясы атынан осы маңызды оқиғамен шын жүректен құттықтаймын. Бүгін №8 кокс батареясы оны салу барысындағы негізгі кезеңдердің бірі – отқа төзімді қалау жұмыстарына ресми түрде кірісті. Көрсеткен сенімі үшін Qarmet компаниясына алғыс айтамын. Бұл жұмыс жоғары дәлдікті, технологиялық талаптарды қатаң сақтауды және кәсіби шеберлікті талап етеді. ACRE мен Qarmet мамандарының бірлескен күш-жігерінің арқасында барлық қажетті талаптарды орындап, жобаны сәтті жүзеге асыратынымызға сенімдімін", – деді Ван Миндэн.

Сонымен қатар №9 кокс батареясының құрылыс алаңында да жұмыстар жалғасып жатыр. Атап айтқанда, инфрақұрылым нысандары салынып, металл конструкциялар монтаждалуда.

№8–9 кокс батареяларының құрылысы кәсіпорынның соңғы ондаған жылдағы өндірістік қуаттарын ауқымды жаңғырту бағдарламасының бір бөлігі. Сонымен қатар Qarmet-те жаңа сортты прокат кешені, ыстық мырыштау және полимерлі жабындар желісі, құю-прокат кешені және басқа да ірі жобалар жүзеге асырылып келеді.

Бүгінде комбинат аумағында кәсіпорынның алдағы ондаған жылдардағы технологиялық дамуын айқындайтын өндірістің жаңа буыны қалыптасуда.