Айым Сейітметова күйеуі Талғат Итаевпен ажырасқанын мәлімдеді
Актриса әрі блогер Айым Сейітметова күйеуі Талғатпен ресми түрде ажырасқанын мәлімдеді. Бұл туралы Stan.kz ақпарат агенттігі хабарлайды.
Блогер әлеуметтік желідегі парақшасында бұл жаңалықты көпшілікке айту-айтпау туралы ұзақ ойланғанын жазған. Алайда отбасының өмірі бірнеше жыл бойы жұрт назарында болғандықтан, бұл туралы өзі айтуды жөн көрген.
“Талғат екеуміз ажырастық. Бұл сөздің артында өміріміздің үлкен бір кезеңі тұр. Жақсы сәттеріміз де көп болды, отбасымыз болды. Ең бастысы – бізді өмір бойы байланыстыратын қызымыз бар”, – деп жазды ол.
Актрисаның сөзінше, белгілі бір уақытта ерлі-зайыптылардың арасында олардың некесін жалғастыруға мүмкіндік бермейтін жағдайлар болған. Дегенмен ол оның мән-жайын көпшілікке жария еткісі келмейтінін жеткізді.
Айым Сейітметова қазір бұрынғы жұбайымен арадағы сыйластықты сақтауды маңызды санайтынын атап өтті. Оның айтуынша, екеуі енді ерлі-зайыпты болмаса да, қыздары үшін әрқашан әке мен ана болып қала береді.
“Қызымыз әке-шешесінің екеуінің де махаббатын сезініп өссе деймін. Біздің ересектер ретінде қабылдаған шешіміміздің салдарын бала көтермеуі керек”, – деген актриса.
Сондай-ақ ол оқырмандарынан бұл жағдайдан сенсация іздемеуді, түрлі болжам жасамауды және тараптардың ешқайсысына тіл тигізбеуді сұрады.
Айым бұл шешімнің өзіне оңайға соқпағанын жасырмады. Дегенмен оның айтуынша, енді екеуінің де өмірінде жаңа кезең басталмақ.
Ақмолада 13 жастағы бала көкпар ойнап жүріп, қаза тапты: Туыстары оны атпен қағып өткен адамның жазасыз қалғанына наразы
