Бағдарлама 2030 жылға дейінгі мерзімге есептелген және 1930-1980 жылдар аралығында салынған екі қабатты және одан төмен ескі көппәтерлі үйлерді қамтиды. Сондай-ақ, жеке тұрғын үйлер, өнеркәсіптік, коммерциялық және басқа да жаңарту мен инфрақұрылымды жаңғыртуды қажет ететін нысандар да бағдарламаға енгізілген.

Сүруге жататын нысандар үш санатқа бөлінген:

Бірінші санат – қызыл сызықтарда орналасқан немесе инженерлік инфрақұрылым, әлеуметтік және басқа да нысандар салуға арналған ғимараттар. Мұндай үйлерді қала әкімдігі сатып алады.
Екінші санат – қала үшін басымдыққа ие тұрғын үй, әлеуметтік немесе коммерциялық нысандар салынатын аумақтарда орналасқан ғимараттар. Бұл нысандарды бағдарламаның операторы – "Алматы әкімдігінің капиталды құрылыс кәсіпорны" сатып алады.
Үшінші санат – кварталдар, полиорталықтар немесе кешенді жаңартуды қажет ететін өнеркәсіптік аумақтардағы ғимараттар. Бұл нысандарды инвесторлар сатып алады.

Тұрғын үй иелеріне өтемақының үш нұсқасы ұсынылады:

"Бөлме үшін бөлме" принципі бойынша жаңа тұрғын үймен айырбастау (тұрғындар санына қарамастан).
Жаңа үй тапсырылғаннан кейін баламалы тұрғын үй беру (оған дейін уақытша тұрғын үй беріледі).
Тұрғын үйді тәуелсіз бағалау компаниясы анықтайтын нарықтық құны бойынша сатып алу.

Әкімдік мәліметінше, 2030 жылға дейін кемінде 676 ескі үй жаңартылады, бағдарлама шамамен 7,5 мың пәтер иелерін қамтиды.

Талқылау