"Мұны түсіндіре алмаймын": Бишімбаев не себепті Салтанат Нүкенованың саусақ іздері еш жерде болмағаны туралы сұраққа жауап берді
Астана қаласының қылмыстық істер жөніндегі мамандандырылған ауданаралық сотында әйелін өлтірді деп айыпталған экс-министр Қуандық Бишімбаевтың қылмыстық ісі қаралып жатыр. Жәбірленуші тараптың адвокаты Жанна Оразбақова бөлмеде Салтанат Нүкенованың саусақ іздері жоқ екенін айтты. Бұл туралы Stan.kz ақпарат агенттігі хабарлайды.
Тікелей эфирден скриншот
Сотта Байжанов қайғылы оқиға болған күні кеңес сұраған дәрігер куәгер болып келді. Ерсұлтан Сәрсенбаев сөз сөйлегеннен кейін Бишімбаев пен Байжановтың әрекеттеріне қатысты тосын сұрақтар пайда болды.
"Жекеменшік жедел жәрдем шақырыңдар деген ұсыныс күдік ұялатады. Не себепті олай айттыңыз? Сізге келушілер беделді адамдар немесе бір жағдай болды деп айтты ма?”, – деді адвокат.
Куәгер бұған “білмеймін” деп жауап берді.
Сондай-ақ адвокат бөлмеде марқұмның саусақ іздері мүлдем анықталмағанын айтып, олар қайда кеткенін сұрады.
“Саусақ іздерін сүрткен мүсәтір қайда кетті? Бұл бөлмеде Салтанаттың бірде-бір саусақ ізі табылған жоқ. Бишімбаевқа қояр сұрағым бар. Сіз Салтанатпен бірге ішімдік ішкеніңізді айттыңыз. Бірақ қалайша стақанда, бөтелкеде, шыны ыдыста тек сіздің саусағыңыздың ізі тұр, ал Салтанаттікі жоқ?" – деп сұрады адвокат Жанна Оразбақова.
Қуандық Бишімбаев алкогольді өзі құйып бергенін айтты.
"Шынымды айтсам, білмеймін. Кейбір сараптамаларда күртешеде оның саусақ іздері бар. Жарайды, бәлкім, мен өзім құйып бергендіктен, солай болды. Мүмкін ол вазаларды ұстаған жоқ. "Мұны түсіндіре алмаймын", – деп жауап берді Бишімбаев.
"Ол стақанға қол тигізбей, қалай ішті?”, – деді адвокат.
"Мен оның ішіп отырғанын көрдім. Мен іздердің қалай алынғанын түсіндіре алмаймын", – деді сотталушы.
Бұған дейін Бишімбаевтың туысы Байжанов көмек сұрап қоңырау шалған дәрігер сотта куәгер болғаны айтылды.
Еске салайық, бұрынғы ұлттық экономика министрі Қуандық Бишімбаев әйелі Салтанат Нүкенованы өлтірді деген күдікпен ұсталған. Кейіннен қылмысты жасырды деген айыппен Салтанат Нүкенова көз жұмған мейрамхананың директоры да тұтқындалды.
Сондай-ақ экс-министр Қуандық Бишімбаевқа Қылмыстық кодекстің 110-бабы 2-бөлігі ("Азаптау"), Қылмыстық кодекстің 99-бабы 2-бөлігі 5-тармағы ("Аса қатыгездікпен адам өлтіру") бойынша жаңа айыптар тағылған еді. Ал оның туысы Бақытжан Байжанов қылмысты жасырғаны және хабарламағаны үшін айыпталған.