"Мұғалім есікті жауып кеткен": Алматыда бірінші сынып оқушысы мектептің терезесінен құлап кетті
Алматы қаласында бірінші сынып оқушысы мектептің терезесінен құлап кетті. Бұл туралы ақпарат әлеуметтік желілерде пайда болды. Қалалақ денсаулық сақтау басқармасындағылар аталған ақпаратты растады, деп хабарлайды Stan.kz ақпарат агенттігі.
Оқиға куәгерінің әлеуметтік желілерде тараған ақпаратына сәйкес, оқиға №80 мектепте орын алған. Айтуынша, қазақ тілі пәнінің мұғалімі аңдаусызда бірінші сынып оқушысын кабинетте қамап кетіпті. Балалар оқушының сыныпта жалғыз қалғанын айтқан. Мұғалім сыныпты тексерген кезде, оқушы партаның астына иіліп, көрінбей қалған. Артынша сыныптың жабық екенін көріп, шошыған оқушы терезеден секіріп кетіпті. Оны жоғары сынып оқушылары тауып алған. Оқушы түрлі жарақатпен ауруханаға жеткізілді.
Қалалық денсаулық сақтау басқармасындағылар аталған ақпаратты растады. Олардың мәліметінше, мектептің екінші қабатының терезесінен құлап кеткен оқушы бас сүйек-ми жарақатын алып, миы шайқалып, кәрі жілігі сынған. Дәрігерлер баланың жағдайы тұрақты деп бағалап отыр.
Әйелім ұлымды өлтірген жігітті түрмеден келгенше күтіп жүрді: Қарағанды көз жұмған баланың әкесі оқиға жайлы айтты >>>
«Балаға қосарлас жарақат, бас сүйек-мидың жабық жарақаты, мидың шайқалуы, көкірек қуысының жарақаттануы, көкірек қуысы ағзаларының жаралануы, кәрі жілігінің жабық сынығы диагнозы қойылды. Ол жансақтау бөліміне жатқызылды. Бүгінде әрі қарай ем-дом жасалуы үшін травматология бөліміне ауыстырылды», - дейді денсаулық сақтау басқармасындағылар.