Мәскеу соты екі қазақстандықты теміржолға диверсия жасағаны үшін 13 жылға соттады
Мәскеу қалалық соты Қазақстан азаматтары Александр Абрам мен Эдуард Бурдиловты алдын ала сөз байласу арқылы теміржолға диверсия жасағаны үшін 13 жылға бас бостандығынан айырды. Бұл туралы Stan.kz ақпарат агенттігі Медиазона басылымына сілтеме жасап хабарлайды.
Фото: Суды общей юрисдикции города Москвы
Қазақстан азаматтары Александр Абрам мен Эдуард Бурдилов 2023 жылы 22 маусымда ұсталған еді. Оларға Ресей темір жолында диверсия (өндірістік нысандарды жарамсыз ету, жұмыс күші мен құрал-жабдықтарына зиян келтіру) жасады деген айып тағылды.
Мәскеу соты сотталушыдан "Ресей темір жолы" компаниясының пайдасына 387 мың рубль (шамамен 2 100 000 теңге) шығын өндіру туралы шешім қабылдады. Прокурор оларға 13 жыл бас бостандығынан айыруды сұрады. Ақыры сот осы мерзімге тағайындады.
Абрам төрт жылын түрмеде, ал қалған тоғызын қатаң режимдегі колонияда өтейді. Бурдилов 13 жылының бесеуін түрмеде, сегіз жылын қатаң режимдегі колонияда өтейді.
"Ресей темір жолы" АҚ азаматтық талап арызы толық көлемде қанағаттандырылды.