Курьер алматылық зейнеткерді алаяқтардан құтқарып қалды

Алматыда курьер қырағылық танытып, алаяқтарға жиған ақшасын ұстатып жібермек болған егде жастағы әйелге көмектесті. Бұл туралы Stan.kz ақпарат агенттігі хабарлайды. 

Жеткізу қызметіне тапсырыс түскеннен кейін, курьер зейнеткер әйелден джинсы салынған пакет пен бірнеше банканы алып кеткен. Алайда әйелдің әрекеті оған күмәнді көрінген: ол сәлемдеменің ішіндегі заттар туралы сұрақтарға нақты жауап бермей, бұқпантайлап жауап берген.

Курьер сәл жүрген соң жеткізуді тоқтатып, күдіктеніп тұрғанын айтып полицияға хабарласқан. Түрксіб аудандық полиция басқармасының қызметкерлері оқиға орнына жедел жетті.

Белгілі болғандай, бұған дейін зейнеткер әйелге алаяқтар қоңырау шалған. Олар өздерін шетелде жүрген туысы ретінде таныстырып, шұғыл көмек көрсету үшін қолындағы бар жинаған ақшасын беруге көндірген.

Оқыңыз

Павлодарда алаяқтар зейнеткерлерді банкте тортты жаруға мәжбүрледі (видео) Оқыңыз

Кейін алаяқтар оған "декларацияланбаған ақша қаражатын тексеру" туралы айтып, қолма-қол ақшаны декларациялау үшін беруді талап еткен.

Алаяқтардың сөзіне сенген зейнеткер 3 мың долларды джинсы шалбарының қалтасына жасырып, оны басқа заттармен бірге пакетке салып, курьерге берген.

Осылайша курьердің күдігі расталып, алаяқтардың қылмыстық әрекетінің жолы кесілді.