Қостанай облысында екі бала мұз астына түсіп кетіп көз жұмды
Қостанай облысында екі бала мұз астына түсіп кетіп көз жұмды, деп хабарлайды Stan.kz ақпарат агенттігі ТЖК-ның баспасөз қызметіне сілтеме жасап.
Оқиға 10 қарашада Жетіқара қаласында орын алған. Полицейлер жасанды су қоймасынан үш баланы құтқарыпты. Алайда олардың екеуі көз жұмды.
«Алдын ала мәлімет бойынша, олар қатпаған мұз бетінде ойнап жүріп, абайсызда суға түсіп кеткен. Судың тереңдігі шамамен екі метр болады. Полиция қызметкерлері балаларды судан алып шығып, жедел түрде жедел жәрдем бригадасына тапсырды. Аудандық орталық ауруханада дәрігерлер 2014 және 2013 жылғы екі баланың өлімін тіркеді. Алдын ала мәліметке сәйкес, олар үсіп көз жұмған», - дейді ТЖК-дағылар.
Ал 2011 жылғы бала дәрігерлердің бақылауында. Ақ халаттылар оның жағдайын орташа ауыр деп бағалап отыр.
Сонымен қатар балаларды құтқару кезінде 1954 жылғы куәгер зардап шегіп, үсіп қалыпты. Оның жағдайы да орташа ауыр деп бағалануда.