Қазақстандағы орташа жалақы белгілі болды
Ұлттық статистика бюросы Қазақстандағы орташа айлық жалақы мәліметтерін ұсынды. Бұл туралы Stan.kz ақпарат агенттігі хабарлайды.
Ведомствоның мәліметінше, Қазақстандағы кәсіпорындарда жұмыс істейтіндердің жалпы саны 3 миллион 975 мың 641 адам. Барлығы 6 миллионнан астам жұмысшы бар.
2024 жылдың бірінші тоқсанында бір қызметкердің орташа айлық атаулы жалақысы – 382 мың 279 теңге.
"Ол есептелген еңбекақы қорының сомасын қызметкерлердің нақты санына және есепті кезеңдегі айлар санына бөлу арқылы анықталады", – делінген хабарламада.
Айта кетейік, бұған дейін Қарағанды облысы әкімінің орынбасары Ермек Алпысов мемлекеттік қызметкерлердің жалақысы мен үстемақысын көбейтуді ұсынғаны туралы жазған едік.
Статистикаға сәйкес, Қарағанды облысында 2023 жылға арналған орташа айлық жалақы 367 мың теңге, ал Қазақстанда 394 мың теңге. Ал ірі кәсіпорындарда жақсы мамандар 800 мыңнан 1 миллион теңгеге дейін жалақы ала алады екен. Бас маманның лауазымдық жалақысы А деңгейлі ауданда еңбек өтіліне байланысты ең көп дегенде 260 мың теңге болған.
Облыстық деңгейде – 302 мың теңге. Қызметкерлердің лауазымдық жалақысы кейінгі рет 2021 жылдың 1 шілдесінде көтерілген.