Орталық коммуникациялар қызметінде өткен брифингте төтенше жағдайлар министрлігінің өкілі Асқар Шәріптің мәлімдеуінше, азаматтық қорғау қызметтері Атырау, Ақтөбе қалаларында, Батыс Қазақстан және Солтүстік Қазақстан облыстары су тасқынына қарсы іс-шаралар, су тасқынының зардаптарын жою және халыққа көмек көрсету бойынша жұмыстарды жалғастырып жатыр.

Батыс Қазақстан облысында жағдай тұрақталып келеді. Су басқан саяжайларға мониторинг жүргізіліп жатыр. Төтенше жағдайлар департаменті мен полиция қызметкерлері су басқан аумақтарды бірлесіп патрульдеді.

"Атырау облысында су деңгейіне мониторинг жүргізіліп жатыр. Бүгінгі таңда Атырау қаласында су тасқынынан қорғау мақсатында 498 шақырым бөгеттерді нығайту үздіксіз жүргізіліп жатыр” – деді Асқар Шәріп.

Солтүстік Қазақстан, Атырау және Ақтөбе облыстарында 6148 тұрғын үй мен 2794 аула аумақтарынан су бұрылды.

Су тасқыны басталғаннан бері 119 220 адам құтқарылды және эвакуацияланды, оның 44 776-сы – балалар. Республика бойынша 36 745 адам елге оралды, ал 6909 адам эвакуациялау пункттерінде екен.

Авариялық-құтқару және су тасқынына қарсы жұмыстарға 27 мыңнан астам адам жұмылдырылған.

27-29 сәуір аралығында Жамбыл облысының таулы және тау етегіндегі аудандарында нөсер жауын-шашын болжамына байланысты еңісті ағынды сулардың қалыптасуы және өзендердегі су деңгейінің көтеріледі деген болжам бар.

27 сәуір-2 мамыр аралығында Алматы облысының Үлкен және Кіші өзендерінің бассейндерінде (2700 метрден жоғары биіктік белдеуінде) жауын-шашынға, биіктікке және қар жамылғысының тұрақсыз жағдайына байланысты қар көшкіні жүру қаупі бар.

Талқылау