Қазақстанда резервтегі 83 кен орнын аукцион арқылы сату жоспарланып отыр
Өнеркәсіп және құрылыс министрлігі Геология комитетінің төрағасы Ерлан Ақбаров 2024 жылдың маусым айының соңына қарай Қазақстанда резервтегі 83 пайдалы қазбалар кен орнын аукционға шығару жоспарланып отырғанын айтты. Бұл туралы Stan.kz ақпарат агенттігі “Хабар 24” арнасына сілтеме жасап хабарлайды.
Фото: Pixabay
Геология комитеті жеке инвесторлар келешегі бар жер қойнауын іздеуді инвестициялауға қызығушылық танытып отырғанын хабарлады.
Мамандардың айтуынша, жер қойнауын пайдалануға инвестицияны арттыру үшін еліміздің барлық аумағы мемлекеттік қорды басқару бағдарламасына енгізілген. Орташа барлау мерзімі 10 жылға дейін созылуы мүмкін. Жалпы алғанда, мемлекет балансында пайдалы қазбалардың 103 түрі бойынша тоғыз мыңнан астам кен орны бар.
Сондай-ақ ведомство өкілі Қазақстанның шикізат қоры 100 жылға дейін жетуі мүмкін екенін атап өтті.
"Өткен жылы 74 жер қойнауы учаскесі бойынша 2 аукцион өткізілді, нәтижесінде қол қою бонусы шамамен 3,5 млрд теңге болды. Биыл 30 маусымға дейін қайтарылған 23 және резервтегі 83 кен орнын аукционға шығару жоспарланып отыр. Аукциондар ел аумағында өндірісті орташадан төмен емес деңгейде іске қосу және төлемдерді өңірлердің әлеуметтік даму бағытына аудару міндеттемелері негізінде өткізіледі", – деді Ерлан Ақбаров Орталық коммуникациялар қызметі алаңында өткен баспасөз мәслихатында.
Бұған дейін кореялық геологтар Қазақстанда құны 15,7 млрд доллар болатын литий кен орнын тапқанын жаздық.
Литий аккумуляторлардың негізгі құрамдас бөлігі болғандықтан, электромобиль өнеркәсібі және басқа да заманауи салалар үшін маңызды минералдардың бірі. Табылған ресурстардың құны шамамен 15,7 миллиард долларға бағаланған.
KIGAM келесі жылы литий өндіруді бастау үшін аймақта бұрғылау құқығына өтініш беруді жоспарлап отыр.