Қазақстанда букмекерлік кеңселер мен лотереяларды жарнамалауға тыйым салынады
Қазақстанда букмекерлік кеңселер мен лотереяларды БАҚ беттерінде де, көшеде де жарнамалауға тыйым салынады. Бұл туралы Stan.kz ақпарат агенттігі хабарлайды.
Фото: Артем Геодакян / ТАСС
Ойын бизнесі туралы заң букмекерлік кеңселер мен букмекерлік дүкендерді ғимараттардың, құрылыстардың және көліктердің сыртында жарнамалауға, сондай-ақ бұқаралық ақпарат құралдары, кино, видео және анықтамалық қызметтерде жарнамалауға тыйым салады.
Букмекерлік кеңселер мен букмекерлік дүкендердің орналасқан жерінде, спорт ғимараттарының ішінде, спортшылардың жабдықтарында, спорттық теле-радио арналарда, спорттық іс-шараларға арналған интернет-ресурстарда жарнамаға рұқсат етіледі. Отандық телеарналар халықаралық спорт жарыстарын тікелей трансляциялау кезінде букмекерлік кеңселер мен ұтыс ойынын жарнамалай алады.
Сонымен қатар түзетулерде ұялы байланыс операторларына электронды казинолар, онлайн-казинолар, сондай-ақ халықтың абоненттік құрылғыларына құмар ойындар мен бәс тігулер туралы жарнаманы қамтитын мәтіндік хабарламалар жіберуге тыйым салу көзделген.
Бұған дейін Қазақстанда лицензиясы жоқ букмекерлер қызметіне тыйым салынатыны айтылды.