Қазақ тілі мен тарихын білмейтіндерге азаматтық берілмейді – Ішкі істер министрлігі жаңа заңды түсіндірді
Ішкі істер министрлігі кімге Қазақстан азаматтығы берілмеуі мүмкін екенін айтты. Бұл туралы Stan.kz ақпарат агенттігі хабарлайды.
Фото: gov.kz
Ішкі істер министрлігінің хабарлауынша, "Азаматтық туралы" заңда азаматтыққа қабылдаудан бас тартудың негіздері нақтыланды. Енді мемлекеттік тілді білмегендер Қазақстан азаматтығын ала алмайды.
“Мысалы, мемлекеттік тілді қарапайым деңгейде, еліміздің тарихы мен Конституциясының негіздерін білмеген жағдайда азаматтық берілмейді. Қажет деңгейді Ғылым және жоғары білім министрлігі айқындайды. Түзетулер азаматтардың қоғамға тез бейімделуін көздейді. Тілді білу қоғамға тезірек сіңіп, мемлекет өміріне араласуы үшін қажет. Бұл түзетулер әлемдік тәжірибеге сай. Көптеген елде азаматтық алу үшін мемлекет тарихы мен мемлекеттік тілді білу бойынша емтихан тапсыру қажет”, – деді Ішкі істер министрлігінің ресми өкілі Шыңғыс Әлекешев.
Ведомство бұл түзетулердің әлемдік тәжірибеге сәйкес екенін атап өтті. Көптеген елдерде азаматтық алу үшін мемлекет тарихын және мемлекеттік тілді білуге арналған емтихан тапсырады. Мысалы, Германияда азаматтық алуға үміткерлер неміс тілін білуге және неміс мәдениеті мен дәстүрін сақтауға міндетті. Канадада сол елдің азаматы болу үшін тарихы мен жауапкершілігін білуіңіз керек, сонымен қатар провинцияға байланысты ағылшын немесе француз тілдерін білуге арналған тесттен өтуіңіз керек. Түркияда жалпы негізде азаматтық алған кезде түрік тілін білу міндетті.
Айта кетейік, бұған дейін мемлекет басшысы Қасым-Жомарт Тоқаев қазақ тілін және тарихын білмейтіндерге азаматтық бермеу, террористер мен педофилдердің Қазақстанға кіруіне тыйым салатын заңға қол қойған еді.