"Қатты ұялдым": Елдос Сметов Олимпиададағы жеңісінен кейін не үшін намыстанғанын айтты

Дзюдодан Олимпиада чемпионы Елдос Сметов Париждегі ойындарда не үшін ұялғанын айтып берді. Бұл туралы Stan.kz ақпарат агенттігі хабарлайды. 

Фото: olympic.kz

"Қызық Times" бағдарламасына берген сұхбатында Сметов олимпиада барысында ағылшын тілін білмегені үшін өзін ыңғайсыз сезінгенін айтты.

"Менің бүкіл әлем бойынша қарсыластарым мен достарым бар. Олармен сөйлесейін десем, ойымды жеткізе алмаймын. Олар да маған сұрақ қойып, әңгіме айтып жатады, бірақ мен түсінбеймін. Алайда бұл маған қатты әсер етпейтін", – дейді Сметов. 

Спортшы тіл білмегені үшін ең қатты ұялған сәтінің Олимпиадағы жеңісінен кейін болғанын атап өтті. 

"5 бөлмелі үй мен lexus 600-ге қуанып жүрген сияқты": Елдос Сметов пен бапкерінің биі желіні жарды

“Олимпиадағы жеңістен кейін кешке басшылық пен Олимпиада чемпиондары бас қосқан мерекелік кешкі ас ұйымдастырылды. Барлығы құттықтауға келеді. Мен тек congratulations (құттықтаймын) деген сөзді түсінемін, барлығына thank you (рақмет) деп жауап беремін. Олар бірдеңе айтып жатты, мен тек қарап тұрдым, тіл білмегенім үшін қатты ұялдым. Мен бәрін түсінгендей кейіп танытып, алғыс айттым, бірақ олардың не айтқанын түсінбедім. Тек мені мақтап жатқанын сездім", – дейді олимпиада чемпионы.

Елдос Сметов Олимпиададан кейін ағылшын тілін үйренуді алдына мақсат етіп қойғанын атап өтті. 

Еске салсақ, бұған дейін дзюдодан Париж Олимпидасының чемпионы Елдос Сметовтің өзіне берілген су жаңа көлікті алғашқы бапкеріне сыйға тартқаны туралы жазған едік.