Қаржы пирамидасын жарнамалап сотталған Мейіржан Төребаев пен Мейірхан Шерниязов Алматыға ауыстырылды
Танымал вайнерлер Мейіржан Төребаев пен Мейірхан Шерниязов Павлодардан Алматыға ауыстырылды. Бұл туралы Stan.kz ақпарат агенттігі хабарлайды.
Фото: instagram.com/meirzhach_tv/make_sakevich
БАҚ беттерінде Мейіржан Төребаевтың Павлодардан Алматыдағы минималды қауіпсіздік колониясына ауыстырылғаны туралы ақпарат тарады. Ішкі істер министрлігінің Қылмыстық-атқару жүйесінің комитеті (ҚАЖ) вайнер Мейіржан Төребаев пен Мейірхан Шерниязовтың Алматыға ауыстырылғанын растады.
“Алматы қаласындағы мекемеде ұстау лимиті ұлғаюына байланысты бірқатар сотталғандар, оның ішінде аталған адамдар тұрғылықты жеріне ауыстырылды”, – деп мәлімдеді Қылмыстық-атқару жүйесінің комитеті.
Еске салайық, Төребаев пен Шерниязов Қылмыстық кодекстің 217-бабы "Қаржы (инвестициялық) пирамидасын құру және басқару" бойынша кінәлі деп танылды. Олардың әрқайсысы бес жыл бас бостандығынан айырылды. Ал қалған айыпталушылар 8 жылдан 14 жыл арқалаған еді.
Бұған дейін вайнердің әйелі Дана Есеева оның Алматыға ауысып, күндіз жұмыс істеп жүргенін айтты.