Қарағанды облысында балалардың жаппай улануы - Бас прокуратура тергеуді бастады
Бас прокуратура Қарағанды облысындағы балаларға арнаулы әлеуметтік қызмет көрсету орталығындағы балалардың улануына қатысты тергеуді бастады. Бұл туралы Stan.kz ақпарат агенттігі хабарлайды.
Іс Қылмыстық кодекстің 304-бабының 2-бөлігі (Ауыр зардаптарға әкеп соққан санитарлық ережелерді немесе гигиена нормаларын бұзу) бойынша тергелуде. Қылмыстық іс Қарағанды облысы прокуратурасының арнайы прокурорларының өндірісіне қабылданды. Құқық қорғау және арнайы органдардың тәжірибелі қызметкерлерінен ведомствоаралық тергеу-жедел тобы құрылды. Тиісті сараптамалар тағайындалды.
"Тергеу аясында жауапты қызметкерлердің әрекетіне тиісті құқықтық баға беріледі", - деді Бас прокуратура.
Елімізде балаларға, оның ішінде ата-анасының қамқорлығынсыз қалған жетімдерге, сондай-ақ мүмкіндігі шектеулі балаларға арнаулы медициналық-әлеуметтік қызмет көрсететін барлығы 84 мекеме бар екені хабарланды (37 балаларға арнаулы медициналық-әлеуметтік қызмет көрсету орталығы, 47 балалар үйі, сондай-ақ 2959 баланы қамтитын отбасын қолдау орталықтары).
"Бас прокуратура уәкілетті мемлекеттік органдар мен аумақтық прокурорларға аталған мекемелерді кешенді тексеруді ұйымдастыруды тапсырды", - делінген хабарламада.