"Қамау керек": Қыдырәлі Болманов туды қорлаған Shiza-ға ең қатаң жаза қолдануды сұрады

"Ирина Кайратовна" тобының концертінде мемлекеттік Туды қолына орап, қорлаған Shiza ең қатаң жазаға лайық. Әнші, продюсер Қыдырәлі Болмановтың пікірі осындай. Оның пікірінше, мұндай сорақы жағдайдың орын алуы елімізде идеологияның дұрыс қалыптаспауынан. Тәрбие тал бесіктен, балабақшадан басталуы керек деген пікірді алға тартты ол. Бұл туралы Болманов Нартай Аралбайұлымен болған подкастта айтты, деп хабарлайды Stan.kz ақпарат агенттігі.

"Кешегі туды умаждап тұрған жігітті, оны жігіт деп те айтқым келмейді. Ол жігіт емес. Жігіт адам өзінің іс-қимылы мен сөзіне бала кезінен жауап беруі керек. Махамбет-Исатайлар, Бөгенбай-Қабанбайлар, Бекзат Саттарханов сияқты олимпиада чемпиондары көк байрағымызды көтеріп жүргенде, бұл умаждайтындай кім? Олимпиада чемпионы болу үшін кемі 15 жыл еңбетенесің, дайындаласың. Сөйтіп көк байрақты әлемнің көгінде көтересің. Оны қолынан түк келмейтін біреу алып, сахнада умаждайды", - деп ашуланды Болманов.

Продюсердің пікірінше, музыка жастардың санасын дұрыс қалыптастырудың немесе улаудың төте жолы. Ал Балуан Шолақ атындағы спорт сарайында өткен концерттегі жағдайға үкіметтен бастап, бәріміз кәніліміз, дейді Болманов. 

• "Әртістердің 90 пайызын мас күйде көрдім": Жан Мұқанов туды қорлаған Шиза мен "ИК" әншісін кешіруді сұрады

• ​​​​​​​Нұрғали Нүсіпжановтің жас келіншегі күйеуінің көзінше Майғазиевтің бетінен сүйемін деп сынға қалды

"Біз Қытайда концертке қатыстық. Біздің әр әніміздің үтір-нүктесін қарап, төрт әнді алып тастады. Тек "Қарындасыма" деген бір ән өтіп кетті. "Еліңді ойлап" деген қайырмасында бүкіл зал болып жыладық. Ондай кезде олар есіктердің бәрін ашып, сарбаздар кіріп келіп, бәрін таратып жібереді екен. Бір айтқан сөзіңнен қате кетсе, тындың. Бұл идеология", - деді Болманов. 

Продюсердің пікірінше, Shiza лақап атымен танымал әртіске ең қатаң жаза қолданылуы керек. Себебі оның жазасын бүгін бермесе, ертең оның әрекетін қайталауға тырысатындар пайда болуы мүмкін, дейді ол. 

"Туды умаждауға болмайтынын бәріміз бала кезден білеміз. Бірақ ана баланың санасында болмай тұр. Оның қасында біреу айқайлап тұр. Бұл біздің ел емес, жын-жуырттың ортасы сияқты. Боқауыз сөздер төгіліп жатыр. Бетбақдалаға бар да, айқайлайсың ба, өзің білесің. Бірақ ертеңгі күні ана болатын қазақтың 13 жасар қыздарының миын улап, олардың көз алдында туды умаждау қылмыстың үлкені деп есептеймін. Қатал заңмен жазалау керек. Қамау керек", - деп мәлімдеді ол.