Дипломат күйеуінен қорлық көрдім деген әйел БАӘ-нен Қазақстанға қайтарылды
Күйеуінен зорлық-зомбылық көргенін айтып шағымданған БАӘ-дегі қазақстандық дипломаттың әйелі елге оралды. Бұл туралы Stan.kz ақпарат агенттігі хабарлайды.
Фото желі кадрларынан
Сыртқы істер министрлігінің мәліметінше, Қазақстанның БАӘ-дегі елшілігінің кеңесшісі жұбайы Карина Мамаштың елге қайтуы үшін рейс ұйымдастырылып, оған балалары тапсырылған.
“НеМолчи.kz” қорының желідегі парақшасында Каринаның алғыс айтқан аудиожазбасы жарияланды. Мұнда ол ризашылығын білдіріп, қазір бәрі жақсы екенін алға тартқан.
"Осы іске қатысқандардың барлығына алғыс айтқым келді. Атап айтқанда Дина Смайыловаға, НеМолчи.kz қорына, Эльнара Байназароваға, Қазақстан СІМ және СІМ қызметкерлеріне көп рахмет!", - деді ол.
Осы тұста қор Сәкен Мамашты жүйелі түрде зорлық-зомбылық жасағаны үшін жауапкершілікке тартуды талап етті. Сонымен қатар балалардың анасымен бірге тұратын жерін анықтап, ажырасу, мүлікті бөлу және алимент өндіріп алу рәсімін жүргізу қажет екені алға тартты.
Еске салсақ, Қазақстандық шенеуніктің әйелі күйеуінен 10 жылдан бері зәбір көріп келе жатқанын айтып, көмек сұраған еді.