Әзірбайжан Арменияны пулеметтен оқ жаудырды деп айыптады
Әзірбайжан қорғаныс министрлігі Армения қарулы күштерін пулеметтен оқ жаудырды деп айыптады. Бұл туралы Stan.kz ақпарат агенттігі хабарлайды.
Бір тәулік ішінде армяндық әскерлер ірі калибрлі пулеметтерді пайдаланып, атысты тоқтату режимін 36 рет бұзды, дейді Баку. Шабуыл Әзірбайжанның Гедабек ауданында және Таулы Қарабақта болған.
Айта кетейік, 12 шілдеде Армения мен Әзірбайжан шекарасында шайқас басталды. Баку мен Ереван бір-бірін арандатушылық жасады деп айыптап еді. Екі тараптан 20-ға жуық адам қайтыс болды.
Екі республиканың арасында 30 жыл бойы Таулы Қарабаққа байланысты жер дауы бітпей келеді. 1991 жылы негізінен армяндар тұратын бұл аумақ Әзірбайжанға тәуелсіз екенін жариялады. Баку аймақты күшпен қайтаруға тырысты. 1994 жылы Әзірбайжан, Армения және Таулы Қарабақ республикасы Ресейдің делдалдығымен бітім туралы хаттамаға қол қойды, бірақ мерзімді түрде аймақтағы әскери операциялар қайта басталды.