Астаналықтар бір-біріне жүгіріп бара жатқан сарбаздардың видеосын жіберіп жатыр
Желіде Нұр-Сұлтанда жүгіріп бара жатқан сарбаздар түсірілген видео тарап жатыр. Қорғаныс министрлігі бұл Қазақстан Республикасы Қарулы күштерінің құрылғанына 30 жыл және Жеңіс күнінің 77 жылдығына арналған жаппай жүгіру іс-шарасы екенін хабарлады, деп хабарлайды Stan.kz ақпарат агенттігі.
Жүгіруге Қазақстан Қарулы күштерінің, басқа да әскерлер мен әскери құралымдардың мыңнан астам әскери қызметшісі, сондай-ақ елордалық Әскери колледж бен "Жас сарбаз" қозғалысының тәрбиеленушілері қатысты.
Спорттық іс-шара "Отан. Армия. Жас сарбаз" деп аталды. Оның мақсаты – салауатты өмір салтын насихаттау, бұқаралық спортты дамыту, өскелең ұрпақты патриоттық рухта тәрбиелеу.
"Бұндай көлемдегі іс-шара елордада алғаш рет ұйымдастырылып отыр. Жаппай жүгіру Қарулы күштердің 30 жылдығы мен Ұлы Жеңістің 77 жылдығына арналды. Оған әскери қызметкерлер ғана емес, өскелең ұрпақ – болашақ Отан қорғаушылар қатысты", - деді Бас штаб бастығының орынбасары Серік Бурамбаев.
Қатысушылар "Отан қорғаушылар" мемориалдық кешенінен Тәуелсіздік, Момышұлы даңғылдары, Сарайшық, Түркістан және Достық көшелерінің бойымен "Астана-Бәйтерек" монументіне дейін бес шақырымнан астам қашықтықты жүгіріп өтті.
Ұлттық әскери патриоттық орталығы мен Ұлттық қауіпсіздік комитеті Шекара қызметінің шығармашылық ұжымдары жарысқа қатысушыларға, елорда тұрғындары мен қонақтарына арнап концерт берді.
"Алдағы 10 жылда мұнай қоры таусылады": Сарапшылар "қара алтынсыз" Қазақстанның болашағы қандай боларын болжады
